इटहरी । बजेट अधिवेशन एकाएक भंग गरेर ओली सरकारका अर्थमन्त्री विष्णु पौडेलले अध्यादेश मार्फत ल्याएको १६ खर्ब ४७ अर्ब ५७ करोडको बजेट खारेज गरि देउवा सरकारले संसद भित्रबाटै बजेट ल्याउने तयारी गरेको छ ।
उच्च स्रोतका अनुसार सर्बोच्च अदालतले समेत चलिरहेको संसद विघटन गरि अध्यादेश मार्फत ल्याइएको बजेट प्रति प्रश्न उठाएपछि सरकारले नयाँ बजेट ल्याउने तयारी गरेको हो ।
कोरोनाको कारण थला परेको अर्थतन्त्रलाई झन भार थप्नेगरि ल्याइएको बजेटले संचित कोषको रकम खर्च गर्ने र ऋण थोपर्ने काम मात्र गर्ने भएकाले चुस्त किसिमको बजेट ल्याउने तयारी भइरहेको स्रोतले बतायो । स्रोतका अनुसार कोरोना महामारीमा परेको जनता, नीजि क्षेत्र र मुलुकको हित हुने किसिमको बजेट आउने छ ।
सरकार परिवर्तन पछि अर्थमन्त्रीमा जनार्दन शर्माले मंगलबार सफथ लिएका छन । उनले अर्थमन्त्रालयको जिम्मेवारी सम्हालेपछि सरकारले निर्वाचनका लागि छुट्याएको बजेट खारेज हुनेगरि नयाँ बजेट ल्याउने तयारी गर्ने स्रोतले जानकारी दिएको छ ।
