भोजपुर । हसनपुर युवा तथा खेलकुद विकास समिति, हतुवागढी वडा नं ९ हसनपुर भोजपुरको आयोजनामा खुल्ला महिला तथा पुरुष अन्तर वडा स्तरीय भलिबल प्रतियोगिता आयोजना हुने भएको छ।
समितिका अनुसार प्रतियोगिता २०८२ साल माघ २९ गतेदेखि फाल्गुन ०३ गतेसम्म सञ्चालन हुनेछ। प्रतियोगितामा महिला र पुरुष दुवै तर्फका टिमहरूको सहभागिता रहनेछ। आयोजकले सम्पूर्ण खेलाडी, खेलप्रेमी तथा सम्बन्धित वडाहरूलाई सहभागिताका लागि हार्दिक निमन्त्रणा गरेको छ।
प्रतियोगितामा पुरुषतर्फ प्रथम हुने टिमले ६१ हजार रुपैयाँ, द्वितीय हुनेले ४१ हजार रुपैयाँ प्राप्त गर्नेछन् भने सेमिफाइनल प्रवेश गर्ने टिमलाई १० हजार रुपैयाँ पुरस्कार प्रदान गरिनेछ। पुरुषतर्फ प्रवेश शुल्क २ हजार रुपैयाँ तोकिएको छ।
यस्तै महिलातर्फ प्रथम हुने टिमले ३१ हजार रुपैयाँ, द्वितीय हुनेले २१ हजार रुपैयाँ तथा सेमिफाइनल प्रवेश गर्ने टिमले ५ हजार रुपैयाँ पुरस्कार प्राप्त गर्नेछन्। महिलातर्फ प्रवेश शुल्क १ हजार रुपैयाँ रहेको छ।
आयोजकले प्रतियोगिता सञ्चालनका लागि आवश्यक नियमहरू पनि सार्वजनिक गरेको छ। FIVE को नियम अनुसार खेल खेलाइने, खेलाडीहरू अनिवार्य जर्सी र जुत्तासहित हुनुपर्ने, एक टिममा म्यानेजरसहित जम्मा १० जना मात्र रहने व्यवस्था गरिएको छ। साथै, खेलसम्बन्धी कुनै विवाद भएमा रेफ्री तथा आयोजकको निर्णय अन्तिम हुने जनाइएको छ।
टिम दर्ता गर्ने अन्तिम मिति २०८२ साल माघ २८ गतेसम्म तोकिएको छ। सो अवधिभित्र दर्ता नगर्ने टिमले प्रतियोगितामा सहभागी हुन नपाउने आयोजकले जनाएको छ।
प्रतियोगिता जाल्पा आधारभूत विद्यालयको खेलमैदान, कोलटारमा सञ्चालन हुनेछ। प्रतियोगिताले स्थानीय स्तरमा खेलकुद विकास र युवाहरूको सक्रियता बढाउने विश्वास आयोजकले व्यक्त गरेको छ।
