लन्डन । गैर आवासीय नेपाली संघ (एनआरएनए) स्कटल्याण्डले एडिनबरामा ११५औँ अन्तर्राष्ट्रिय महिला दिवसको अवसरमा विशेष कार्यक्रम आयोजना गरेको छ।
महिला सशक्तिकरण, समानता र सम्मानको सन्देश फैलाउने उद्देश्यले आयोजित कार्यक्रममा विभिन्न क्षेत्रका प्रतिनिधि तथा समुदायका सदस्यहरूको सहभागिता रहेको थियो। कार्यक्रमको आयोजना तथा समन्वय एनआरएनए स्कटल्याण्डकी महिला संयोजक शुमी भण्डारीले गरेकी थिइन् भने सञ्चालन लक्ष्मी न्यौपाने र सारदा दाहालले गरेका थिए।
कार्यक्रममा सामाजिक व्यक्तित्व सरोजा अर्याल, डा. राधा अधिकारी, डा. शिल्पा त्रिपाठी र प्रकृति थापालगायतले महिला सशक्तिकरण, स्वास्थ्य सचेतना तथा समाजमा महिलाको भूमिकाबारे आफ्ना विचार व्यक्त गरेका थिए।
एनआरएनए स्कटल्याण्डका अध्यक्ष शेर केसीले महिला सशक्तिकरणका लागि संघ सधैं प्रतिबद्ध रहेको बताउँदै महिलाको सम्मान र सहयोगमा सबै अग्रसरर्ने बताए। त्यस्तै राम अधिकारी र सचिव माधव भण्डारीले पनि महिलालाई घर, परिवार तथा समाजमा समान अवसर र सम्मान दिनुपर्नेमा जोड दिएका थिए।
कार्यक्रममा विभिन्न क्षेत्रमा योगदान पुर्याएका महिलाहरूलाई सम्मान तथा प्रशंसा पत्र प्रदान गरिएको थियो। साथै सांस्कृतिक प्रस्तुति, नाचगानलगायत कार्यक्रम पनि समावेश गरिएको थियो।
सहभागीहरूले अन्तर्राष्ट्रिय महिला दिवस महिला अधिकार, समानता र सशक्तिकरणको सन्देश फैलाउने महत्वपूर्ण अवसर भएको बताएका थिए। आयोजकले भविष्यमा पनि यस्ता कार्यक्रम निरन्तर आयोजना गर्ने प्रतिबद्धता व्यक्त गरेका छन्।
