सुनसरी । फागुन २१ गते हुन गइरहेको प्रतिनिधि सभा निर्वाचनको समय नजिकिँदै गर्दा सुनसरी निर्वाचन क्षेत्र नं. ३ मा नेकपा (एमाले) की उम्मेदवार भगबती चौधरीले आफ्नो सक्रियता बढाउनु भएको छ । निवर्तमान सांसद समेत रहनु भएकी भगबती चौधरीका पक्षमा जनलहर बढेसँगै उहाँ यतिबेला आफ्नो निर्वाचन क्षेत्रका जनताविच सल्लाह सुझाबहरु संकलनमा ब्यस्त हुनुहुन्छ ।
शनिबार मात्रै चौधरीको सक्रियतामा दुहवी नगरपालिका वडा नं. ९ मा ५२ जना महिलाहरुले एकसाथ नेपाली कांग्रेस परित्याग गरी एमालेमा प्रवेश गरेका छन् । पार्टी प्रवेश कार्यक्रममा नव प्रवेशीहरुलाई संवोधन गर्दै उम्मेदवार चौधरीले समाज रुपान्तरण र महिला सशक्तिकरणका लागि राजनीतिमा महिला सहभागीता अपरिहार्य भएको बताउनु भयो । नेकपा एमालेले महिलाहरुको हक अधिकार सुनिश्चित गर्न प्रतिबद्ध रहेको जिकीर गर्नुभयो ।
‘नेकपा एमाले विचार सिद्धान्त र जनताको पक्षमा उभिएको पार्टी हो, लैङिक समानता, सामाजिक न्याय र आत्मनिर्भर अर्थतन्त्रका पक्षमा उभिएको पार्टी हो । महिलाहरुलाई राज्यका सबै क्षेत्रमा अवसर दिन एमाले प्रतिबद्ध छ ।’ उम्मेदवार चौधरीले भन्नुभयो । पार्टी प्रवेश गर्दै महिलाहरुले आफुहरु एमालेले अंगिकार गरेको राष्ट्र, राष्ट्रियता, स्वाधिनता, जाति, वर्ग, समुदायको उत्थानका सिद्धान्त र विचारबाट प्रभावित भएको तथा नेतृ भगबती चौधरीले महिला सशक्तिकरणका सवालमा निर्वाह गर्नुभएको भूमिकाबाट प्रभावित भएर पार्टी प्रवेश गरेको बताए ।
त्यसो त, सुनसरी क्षेत्र नं. ३ मा भगबती चौधरीप्रति जनताको उत्साहजनक समर्थन रहेको छ । सामाजिक कामसँगै राजनीतिमा उदाउनु भएकी चौधरीले साढे तीन वर्ष सांसद तथा करिब ५ महिना मन्त्री भएर आफ्नो क्षेत्रका लागि गर्नुभएका कामबाट मतदाता सन्तुष्ट देखिएका छन् । निर्वाचन क्षेत्रको इटहरी उपमहानगरपालिका, दुहवी नगरपालिका, गढी तथा बर्जु गाउँपालिकाका गाउँगाउँ जनताका गुनासा र समस्याहरु पहिचान गर्न जाँदै गर्दा मतदाताहरुले सकारात्मक प्रतिक्रियासँगै पुनः एक पटक निर्वाचित गराएर पठाउने प्रतिबद्धता नै व्यक्त गरेपछि उम्मेदवार चौधरी पनि उत्साहित देखिनु भएको छ ।
चौधरीले स्थानीय विकासका एजेण्डासँगै उद्यमशीलता, युवा स्वरोजगार र आत्मनिर्भर अर्थतन्त्र जस्ता जनप्रिय एजेण्डाहरु अगाडी सारेकोले यो क्षेत्रका मतदाताहरु मत परिवर्तनको विपक्षमा देखिएको नेकपा एमाले निर्वाचन क्षेत्र नं. ३ परिचालन समितिका संयोजक लिलम बस्नेतले बताउनु भयो ।
