काठमाडौं । काठमाडौं महानगरपालिकाका मेयर बालेन शाहले जेनजी समूहले अन्तरिम सरकारको नेतृत्वका लागि अघि सारेको पूर्वप्रधानन्यायाधीश शुशीला कार्कीको नामलाई समर्थन जनाएका छन्। तर, त्यसअघि संसद् विघटन अपरिहार्य रहेको उनले बताएका छन्।
‘जेनजीहरूले सुरु गरेको ऐतिहासिक आन्दोलनलाई जोगाउन संसद् तत्काल विघटन गरी अन्तरिम सरकार गठन गर्नु आवश्यक छ,’ राष्ट्रपति समक्ष सम्बोधन गर्दै उनले सामाजिक सञ्जाल फेसबुकमा उल्लेख गरेका छन्।
जेनजी प्रतिनिधिहरूले कार्कीलाई नयाँ नेतृत्वका रूपमा प्रधानसेनापति अशोक सिग्देललाई प्रस्ताव गरेका थिए। सो प्रस्तावलाई मेयर बालेनले पनि अनुमोदन गरेका हुन्।
संवेदनशील परिस्थितिमा उत्पन्न हुने घटनाक्रमलाई अगाडि बढाउन इमान्दार, निस्पक्ष र कानुनी मर्यादा जोगाउनसक्ने व्यक्तिको आवश्यकता भएकाले कार्कीको नाम अघि सारिएको बताइएको छ।
बुधबार दिउँसो जेनजी युवाहरूले पूर्वप्रधानन्यायाधीश कार्कीलाई नेतृत्वका लागि प्रस्ताव गरेका थिए। त्यसअघि उनीहरूले सामाजिक सञ्जाल डिस्कर्डमार्फत कसलाई नेतृत्वमा ल्याउने भन्ने विषयमा छलफल चलाएका थिए, जसमा पनि कार्कीको पक्षमा ठोस समर्थन देखिएको थियो।
कतिपयले काठमाडौं महानगर प्रमुख बालेन शाहको नामसमेत सुझाएका थिए। यसअघि मंगलबार बेलुकी उनले स्टाटस लेख्दै जेनजीलाई सेना प्रमुखसँग संवाद गर्न तयार रहन आग्रह गरेका थिए।
बुधबार बिहान जेनजी प्रतिनिधि टोली जंगी अड्डा पुगेको थियो। तर छलफलमा १५ जनाभन्दा बढी पुगेपछि सेना प्रमुख अशोकराज सिग्देलले ‘पहिले आपसमा सहमति गरेर मात्र आउन’ सुझाव दिएका थिए। त्यसपछि जंगी अड्डाकै एक कक्षमा बैठक बसेको थियो।
सो क्रममा केहीले गणतान्त्रिक प्रणालीविरुद्ध प्रस्ताव पनि गरेका थिए, जसका कारण ‘रक्षा बम’ समूह बाहिरिएको थियो। तर अन्ततः कार्कीको नेतृत्वमा नागरिक सरकार गठन गर्ने सहमति भएको हो।
