रामधुनी । इटहरीमा बुधबार ‘मिसेस पूर्वेली आइकन’ प्रतियोगिताको दोस्रो संस्करणका फाइनल प्रतिस्पर्धीहरूको फोटोसुट र भिडियोसुट सम्पन्न भएको छ। ११ जनाले विभिन्न क्रियेटिभ पोजमा फोटो खिचाए भने उनीहरूको परिचयात्मक भिडियो समेत छायांकन गरिएको थियो। सुट इटहरीस्थित सोल्टी होटलमा सम्पन्न भएको थियो, जसको फोटोग्राफी निश्चल ग्यालरीका निश्चल श्रेष्ठले गरे।
ओपन स्पेस प्रालिको आयोजनामा भइरहेको यस प्रतियोगिताले सौन्दर्य मात्र होइन, महिला सशक्तिकरणमा जोड दिने उद्देश्य राखेको छ। फाइनलमा रामधुनीकी कविना पोख्रेल, मोरङकी सृजना लिम्बू, इटहरीकी सीमा लकान्द्री, रंगेली मोरङकी अर्चना सिटौला, इटहरीकी समिता राई, खोटाङकी परिना राई, दुहवी सुनसरीकी रईसा चौधरी, इटहरीकी सिता पूरी, इटहरीकी मेघा खड्का, इटहरीकी अनुशा कुँवर र उर्मिला मगर प्रतिस्पर्धामा छन्।
प्रतिस्पर्धीहरू दुई चरणको डिजिटल र फिजिकल अडिसन पार गर्दै फाइनलमा पुगेका हुन्। आयोजकका अनुसार हाल उनीहरूलाई र्याम्प वाक, बोल्ने कला, महिला सशक्तिकरणसम्बन्धी ज्ञान र अन्य बौद्धिक सिपमा प्रशिक्षण दिइरहेको छ। कोरियोग्राफी शुभेक्षा कार्कीले गरिरहेकी छन्।
विवाहित महिलाहरूको लागि आयोजित ‘मिसेस पूर्वेली आइकन’ प्रतियोगिताको पहिलो संस्करण गत वर्ष सफलतापूर्वक सम्पन्न भएको थियो। यस प्रतियोगितामा सहभागी हुन उचाइ वा तौलको कुनै सीमा तोकिएको छैन। फाइनलिस्टहरू हाल ट्यालेन्ट राउन्डको तयारीमा व्यस्त छन्। विजेताले १ लाख रुपैयाँ नगदसहित आकर्षक उपहार पाउनेछन्। प्रतियोगिताको ग्राण्ड फिनाले असोजको पहिलो सातामा इटहरीमै हुने आयोजकले जानकारी दिएका छन्।
