काठमाडौँ / सरकारले फेसबुकलगायतका सामाजिक सञ्जाललाई सात दिनभित्र अनिवार्य रूपमा सूचीकरण गर्न समय दिने निर्णय गरेको छ। सोमबार बसेको मन्त्रिपरिषद् बैठकले सामाजिक सञ्जाल प्रयोग व्यवस्थापन निर्देशिका २०८० र सर्वोच्च अदालतको आदेशअनुसार सञ्जाललाई जवाफदेही बनाउन यो कदम उठाएको हो।
सरकारले सञ्चार तथा सूचना प्रविधि मन्त्रालयमा सात दिनभित्र सूचीकरणका लागि सम्पर्क गर्न सामाजिक सञ्जालहरूलाई आह्वान गरेको छ। तोकिएको समयमै दर्ता नगर्ने वा सम्पर्क नगर्ने सञ्जाललाई नेपालभित्र प्रयोग गर्न रोक लगाइने निर्णय पनि बैठकले गरेको छ।
सूचनामा उल्लेख भएअनुसार एकपटक दर्ता भएपछि त्यस्तो प्रतिबन्ध हटाइनेछ। साथै, आवश्यक कार्यान्वयनका लागि नेपाल दूरसञ्चार प्राधिकरणलाई निर्देशन दिने निर्णय समेत भएको छ।
