लण्डन । नेपाली फिल्मलाई विश्वव्यापी बजारमा चिनाउने उद्देश्यसहित इन्फा अवार्डको दोस्रो संस्करण लन्डनमा आयोजना हुने भएको छ । जसका लागि तयारी तीव्र बनाइएको आयोजकले जनाएको छ , आगामी सेप्टेम्बर १३ मा हुने गरी तय गरिएको यस अवार्डले नेपाली सिनेमालाई अन्तर्राष्ट्रिय स्तरमा प्रवर्द्धन गर्ने विश्वास आयोजकले व्यक्त गरेको छ ।
जसका लागि फिल्म मूल्याङ्कन प्रक्रिया अहिले सुरु भइसकेको छ । ज्यूरीमा वरिष्ठ कलाकार गौरी मल्ल संयोजकका रूपमा, निर्देशक रमेश बुढाथोकी र करुण सदस्यका रूपमा रहेका छन् । उनीहरूले प्रतिस्पर्धामा रहेका फिल्महरूको अध्ययन कान्तिपुर फिल्म एकेडेमीमा गरिरहेका छन् ।
गत वर्ष नेपाली फिल्मका लागि व्यापारिक र सिर्जनात्मक दुवै दृष्टिले महत्त्वपूर्ण वर्ष बनेको थियो । ‘१२ गाउँ’, ‘छक्का पञ्जा ५’, ‘ज्वाइँसाब’ जस्ता फिल्मले बक्स अफिसमा उत्कृष्ट सफलता पाएका थिए भने बिजय बरालको ‘पूर्ण बहादुरको सारङ्गी’ ले सामाजिक संवेदनशील विषय प्रस्तुत गरेर दर्शक मन जितेको थियो ।
२५ विधामा अवार्ड
गत वर्ष पहिलो संस्करणमा २० विधामा अवार्ड वितरण गरिएकोमा यस पटक २५ विधामा अवार्ड वितरण हुने भएको छ भने उत्कृष्ट ३ को मनोनयन सूची चाँडै पत्रकार सम्मेलनमार्फत सार्वजनिक गरिने आयोजकको दाबी रहेको छ । यसअघि उत्कृष्ट ५ को सूचि सार्वजनिक भइसकेको छ ।
जसमा उत्कृष्ट फिल्मको मनोनयनमा ‘एञ्जिला’, ‘छक्का पञ्जा ५’, ‘कार्साङ’, ‘पूर्ण बहादुरको सारङ्गी’ र ‘तेल भिसा’ पर्न सफल भएका छन् । यी फिल्महरूले व्यापारिक सफलता मात्र नभई विषयवस्तु र प्रस्तुतिका कारण पनि चर्चामा रहेका थिए ।
निर्देशनतर्फ मिलन चाम्स -एञ्जिला, दीपाश्री निरौला -छक्का पञ्जा ५०, यम शेर्पा -कार्साङ,सरोज पौडेल -पूर्ण बहादुरको सारङ्गी, र शङ्कर घिमिरे -तेल भिसा मनोनयनमा परेका थिए ।
अभिनेतातर्फ दयाहाङ राई ‘कार्साङ’,दीपकराज गिरी ,छक्का पञ्जा ५, जितु नेपाल ज्वाइँ साब’, प्रदीप खड्का ,पिताम्बर’ र विजय बराल -पूर्ण बहादुरको सारङ्गी’ बिच प्रतिस्पर्धा हुनेछ । अभिनेत्रीमा स्वस्तिमा खड्का, वर्षा सिवाकोटी, नीता ढुङ्गाना, उपासना सिंह ठकुरी र मलिका महत मनोनयनमा परेका थिए ।
यसै गरी पटकथा, सम्पादन, छायाङ्कन, खलनायक, सह–अभिनेता-अभिनेत्री, नव–अभिनेता-अभिनेत्री, द्वन्द्व निर्देशन, नृत्य निर्देशन, पाश्र्वगायन र संगीतकारसहितका २५ विधामा अवार्ड प्रदान गरिने भएको हो ।
गत वर्षको पहिलो संस्करणमा यूकेवासी नेपाली समुदायले कार्यक्रममा देखाएको उत्साहले आयोजकलाई थप भव्य बनाउन प्रेरित गरेको थियो । यस पटक पनि कार्यक्रमलाई अझै व्यवस्थित र आकर्षक बनाउन तयारी तीव्र गतिमा अघि बढाइएको हो ।
