लण्डन : बेलायतमा पहिलो पटक श्रीमद्भागवत कथा भव्य रूपमा सुरु भएको छ। धर्मदर्शन फाउन्डेशन नेपाल र बेलायतका भक्तजनहरूको सक्रियतामा साउथलस्थित विश्व हिन्दू मन्दिरमा मंगलवारदेखि कथा महोत्सव आरम्भ भएको हो।
समारोहको उद्घाटन नेपाली राजदूत चन्द्र कुमार घिमिरे र पण्डित कुवेर सुवेदीले संयुक्त रूपमा दीप प्रज्वलन गरेर गरेका थिए। उद्घाटन भाषणमा राजदूत घिमिरेले श्रीमद्भागवत कथा नेपालकै पवित्र धार्मिक परम्परा भएको र अब यसको गुञ्जन बेलायतसम्म आइपुग्नु गौरवको कुरा भएको बताए।
“श्रीमद्भागवत कथाले नेपाललाई पवित्र भूमि भनेर संसारभर चिनाएको छ। आज यो कथा बेलायतमा सुनिनु स्वयंमा एक महत्वपूर्ण अवसर हो।भगवानको अमृत वाणी घर–घरमा, जन–जनसम्म पुग्न सकोस् भन्ने मेरो हार्दिक कामना छ,” उनले भने।
राजदूतले बेलायतमा यति ठूलो धार्मिक कार्यक्रम आयोजना गर्नु चुनौतीपूर्ण भए पनि भगवानको कृपाले सम्भव भएको भन्दै आयोजकलाई धन्यवाद ज्ञापन गरे।
उनले श्रीमद्भागवत कथाको आध्यात्मिक महत्वबारे प्रकाश पार्दै भागवत कथा आध्यात्मिक यात्राको मार्गदर्शन भएको बताए ।
कथा सप्ताह आगामी १२ अगस्टदेखि १८ अगस्टसम्म दैनिक सञ्चालन हुनेछ।पहिलो दिनको कथा वाचनमा भक्तजनहरूको उल्लेख्य उपस्थिति थियो।श्रीकृष्ण जन्माष्टमीको पावन अवसर पारेर आयोजना गरिएको यो कार्यक्रम आगामी १६ अगस्टमा श्रीकृष्ण जन्माष्टमी महोत्सव भव्य रूपमा आयोजना गरिने धर्मदर्शन फाउन्डेशनले जनाएको छ।
