इटहरी । पूर्वको केन्द्र बिन्दुको रुपमा परिचित सुनसरीको इटहरीमा आगामी असोज २० गतेदेखि १५ दिने सांस्कृतिक पर्यटन महोत्सव हुने भएको छ ।
स्थानीय पर्यटन र संस्कृतिलाई झल्काउदै चाडपर्वको समयमा मनोरञ्जन दिन महोत्सव आयोजना गर्न लागिएको शनिबार पत्रकार सम्मेलन गर्दै आयोजक विकास निर्माणकर्ताहरुको सञ्जाल इटहरीले जानकारी दिएको हो ।
महोत्सवमा स्थानीयदेखि राष्ट्रिय स्तरका कलाकारहरुको प्रस्तुती रहने मुल आयोजक समितिका संयोजक राजु बस्नेतले जानकारी दिए ।
महोत्सव भब्य र सभ्य रुपमा सफल बनाउनका लागि १५ वटा उपसमिति बनाइएको उनले जानकारी दिए । महोत्सवमा जातीय भेषभुषा सहितको प्रस्तुति एवं साहित्यसम्बन्धी स्टल समेत राखिने उनले जानकारी दिए । महोत्सव सम्पन्न गर्न ५७ लाख ९० हजार रुपैयाँ खर्च हुने अनुमान गरिएको छ ।
महोत्सवबाट संकलन भएको रकम बिपत ब्यावस्थापन कोष खडा गरी राखिने संयोजक बस्नेतले जानकारी दिए ।
महोत्सवमा २० वटा स्टल राखिने छ । जसमा कृषिजन्य, दुग्धजन्यका साथै विभिन्न व्यावसायिक स्टलहरु राखिने संस्थाका अध्यक्ष बिसुधन राईले पत्रकार सम्मेलनमा जानकारी दिए । महोत्सव आगामी असोज २० गतेदेखि कात्तिक ४ गतेसम्म सञ्चालन हुने छ ।
