इटहरी । फिदिम नगरपालिका–२ पाँचथरमा दुई दिनअघि भएको सवारी दुर्घटनामा घाइते भएका मध्ये थप एक जनाको मृत्यु भएको छ ।
मृत्यु हुनेमा ताप्लेजुङ मिक्वाखोला–५ पापुङकी इसेटिमा शेर्पा रहेकी छिन् । उनको बिहीबार बिहान उपचारका क्रममा मृत्यु भएको हो । उनको मृत्यु भएसँगै उक्त दुर्घटनामा परेर ज्यान गुमाउने यात्रुको संख्या ३ जना पुगेको जिल्ला प्रहरी कार्यालय पाँचथरले जानकारी दिएको छ ।
मृतक शेर्पाको झापाको बिर्तामोडस्थित रहेको बीएन्डसी अस्पतालमा उपचारका क्रममा निधन भएको जिल्ला प्रहरी कार्यालय पाँचथरले जनाएको छ ।
आईसियुमा उपचाररत उनलाई चिकित्सकले आज बिहान मृत घोषणा गरेका थिए । यसअघि सोही दुर्घटनामा फिदिम नगरपालिका–१० की ४० वर्षीय सबिना विश्वकर्मा र ताप्लेजुङको मैवाखोला–१ ढुंगेसाँघुका ४५ वर्षीय जितेन्द्रमणिविक्रम वनेमको निधन भएको थियो ।
झापादेखि फिदिम आउँदै गरेको मे १ ज १९४१ नम्बरको ट्याक्सी मेची राजमार्गको फिदिम खण्ड अन्तर्गत फिदिम–२ सामदिनमा दुर्घटना हुँदा सबिना र जितेन्द्रसँगै १५ जना घाइते भएका थिए ।
