इटहरी । धरान उपमहानगरपालिकामा डेंगु संक्रमणका बिरामिको संख्या तीव्र गतिमा बढेको छ ।
दिनकै १०० भन्दा बढीमा संक्रमण देखिन थालेपछि स्थानीय स्वास्थ्य संस्थाहरु बिरामीले भरिन थालेका छन् । वीपी कोइराला स्वस्थ्य बिज्ञान प्रतिष्ठानमा समेत डेंगु संक्रमणका बिरामिहरु अस्तव्यस्त हुन थालेका छन् ।
अहिलेसम्म संक्रमित धरान उपमहानगरपालिकामा संक्रमितको संख्या २ हजार नाघिसकेको छ । २०१९ मा पनि धरानमा डेंगुले महामारीकै रूप लिएको थियो । त्यो समयमा सरकारी तथ्यांक अनुसार १८ हजार संक्रमित भएका थिए, ६ जनाको मृत्यु भएको थियो । अहिले पनि धरान त्यही दिशामा अघि बढेको छ ।
डेंगु संक्रमणको कारण यो वर्ष धरान उपमहानगरपालिका वडा नं. १७ की ३७ वर्षीया एक महिलाको मृत्यु भइसकेको छ ।
प्रतिष्ठानको आकस्मिक कक्षमा १०० वटा मात्र बेड छन् । तर अहिले दैनिक ५० जनाभन्दा बढी बिरामी भर्ना हुन थालेपछि बिरामीको चाप बढेको हो । वैशाखदेखि १७४ जनालाई वार्ड वा आईसीयूमा भर्ना गरेर उपचार गरिसकिएको छ ।
केही दिनयता गम्भीर प्रकृतिका बिरामी बढ्दो रहेको अस्पतालले जनाएको छ । गत वर्ष धरानमा फाट्टफुट्ट मात्रै डेंगु संक्रमण देखिएको थियो । तर, यो वर्ष भने यसले प्रकोपको रूप लिइसकेको छ । धरान उपमहानगरपालिका जनस्वास्थ्य अधिकृत उमेश मेहताका अनुसार २० वटै वडामा संक्रमण फैलिएको उनको भनाई छ ।
अहिले धरानमा डेंगु फैलिनुको प्रमुख कारण भाडाकुँडा, ड्रम, ट्यांकीमा पानी नछोपी राख्नुलाई मानिएको छ । धरानमा पानी दैनिक रूपमा नआउने भएकाले ट्यांकी, ड्रम, बाटा, बाल्टिनमा राख्नुपर्ने बाध्यता छ । तर राम्ररी नछोप्दा लामखुट्टेले त्यस्तो पानीमा फु्ल पारेर आफ्नो संख्यासमेत बढाएको छ ।
