इटहरी । देशका विभिन्न नगरपालिकाहरुले आफ्नो क्षेत्रमा सुर्तीजन्य वस्तुको बिक्रि तथा प्रयोग निषेध गर्दै लगेका छन् । विराटनगर महानगरपालिकाले प्रतिबन्ध लगाएसँगै झापाको कन्काई नगरपालिकालेसमेत सार्वजनिक क्षेत्रमा सुर्तीजन्य पदार्थको बिक्रीवितरण तथा प्रयोगमा प्रतिबन्ध लगाएको छ ।
नगरपालिकाले ऐन नै बनाएर साउन १ गतेदेखि लागू हुनेगरी सुर्तीजन्य पदार्थको बिक्रीवितरण तथा प्रयोगमा प्रतिबन्ध लगाएको हो । नगरसभाबाटै सुर्तीजन्य पदार्थको बिक्रीवितरण तथा प्रयोगमा प्रतिबन्ध लगाउने निर्णय गरिएको नगरप्रमुख राजेन्द्रकुमार पोखरेलले जानकारी दिए ।
चुरोट, खैनी, गुट्खालगायतका सुर्तीजन्य पदार्थका कारण जनताको स्वास्थ्यमा प्रतिकुल असर पर्नुका साथै नगर कुरुप बनेको नगरप्रमुख पोखरेलको भनाइ छ ।
कसैले अटेर वा बेवास्ता गरे नगरको ऐनबमोजिम बिक्रीकर्तालाई अधिकतम ५० हजार रुपैया र प्रयोगकर्तालाई पाँच हजार रुपैयासम्म जरिवाना गरिनेछ ।
