इटहरी । इटहरीस्थित विराटनगर लाइनमा रहेको शुभलक्ष्मी ज्वेलर्समा आइतबार ग्लोबल आइएमई बैङ्कले व्यापारीलाई हातहतियारसहित कर्मचारी खटाएर आतंकित बनाएको भन्दै सोमबार इटहरीका सबै पसल गर्ने गरियो ।
आइतबार साँझ उद्योग वाणिज्य संघ इटहरीका अध्यक्ष जी भवन पराजुलीले एक सूचना जारी गर्दै बैँकबाट अभद्र व्यवहारका कारण त्रसितएको भन्दै संघले बन्दको आह्वान गरेका थिए ।
आर्थिक मन्दीले व्यापार व्यवसाय धराशयी भएको समयमा व्यवसायीको मनोबल गिराउने काममा बैँक सक्रिय भएको भन्दै भत्र्सना गरिएको उनले जानकारी दिएका छन् ।
तर, उवासंघले व्यापार बन्द गर्ने जनाएसँगै इटहरीको मुख्य चौक आसपासका धेरैजसो व्यापारीहरूले सोमबार दिनभर सटर बन्द गरे ।
समयमै ऋण नतिरेको भन्दै सामान जफत गर्न बैँकका गार्डसहित कर्मचारीहरूपसल पुगेका थिए ।
बैंकको इटहरी शाखाका कर्मचारीले हातहतियारसहितको प्रहरी समेत लिएर गई जबरजस्ती सुन र अन्य सरसामान जफत गर्न खोजेर व्यपारीलाई आतंकित बनाएको र गुण्डागर्दी शैलीमा बैंक प्रस्तुत भएको जनाउँदै उवासंघले व्यापार बन्द गरेको हो ।
सुन पसल संचालक राजमणी श्रेष्ठले ग्लोबल आईएमई बैंकको ऋण तिर्नका लागि अर्को एक वाणिज्य बैंकमा ऋणकै लागि आवश्यक प्रक्रिया अगाडि बढाइएको बताए । तर, बैंकका कर्मचारीहरूले गुण्डागर्दीशैलीमा सुन, बनाइएका गरगहना, पैसा र अन्य सामानहरू जबरजस्ती जफत गर्न खोजेपछि आपत्तिको विषय रहेका उनको भनाई छ ।
तर, उवासंघले व्यापार बन्द नभई छलफल र वार्ताको माध्यमबाट समस्या समाधानका निम्ति पहल गर्नुपर्ने व्यापारीहरूको धारणा छ ।
इटहरीकी व्यवसायी गायत्री कटवाल (भण्डारी) ले बैँकको तरिका गलत भएको बताइन् ।
उनले भनिन्, ‘बैँक गलत तरिकाले प्रस्तुत भयो । तर, बैँकको विरुद्धमा, व्यापारीको समस्या समाधान बजार बन्द त होइन नि ।’
भोलिका दिनमा यी भन्दा ठूला र जटिल समस्या पनि आइपर्न सक्ने भन्दै उनले बजार बन्दको कुरामा असहमति जनाएकी छिन् ।
‘बजार बन्द गर्ने कुरामा मेरो सहमत छैन । बजार खोलेर विरोध गर्न सक्नुपर्यो,’ उनले भनिन्, ‘अन्यायमा परेका व्यवसायीहरूले न्याय पाउनुपर्छ । एक त बैँकको प्रक्रिया गलत छ, अर्कोतर्फ उवासंघको निर्णय ।’
बैँकविरुद्ध आन्दोलन गर्दा व्यापारीलाई समस्या दिने बैँकमा आर्थिक कारोबार बन्द गर्ने, खाता क्लोज गर्ने तथा बहस र छलफल गरेमा बैँक आफैँ सचेत हुने उनको तर्क छ ।
‘समस्या समाधानको विकल्प बजार बन्द मात्रै होइन । बन्द बजारलाई पनि उद्योग वाणिज्य संघले खोल्न सक्नुपर्छ,’ भण्डारीले बताउइन् ‘व्यवसाय नै ठप्प पार्नुहुँदैन । ब्याज तिर्नुपर्ने दिन आउँदैछ । अहिलेको अवस्थामा भाडा तिर्न पनि गाह्रो छ ।’
अहिले इटहरीमा पार्किङ समस्या चौतर्फी रहँदा त्यसको निराकरणका निम्ति उवासंघ लाग्नुपर्ने उनको सुुझाव छ ।
‘बजार बन्द गर्दाको क्षतिपूर्ति कसले व्यहोर्ने ? उवासंघले इटहरी नै ठप्प पारिदिने त ?,’ उनले भनिन्, ‘हिजो खुलेको पसल आज किन बन्द भइरहेको छ भनेर खोजी गर्नुपर्छ, त्यता कसैको ध्यान नै पुुगेको छैन ।’
