इटहरी । विराटनगर महानगरपालिका ५ स्थितबाट अबैध रजनीगन्धा र तुलसीसहित तीनजनालाई प्रहरीले पक्राउ गरेको छ ।
कोसी प्रदेश प्रहरी कार्यालय विराटनगरको प्रादेशिक अनुसन्धान समूहले विराटनगर ५ चाँदनी चोकस्थित जय गणेश जनरल स्टोरमा भारतबाट अवैध रूपमा ८ हजार ६९४ पिस रजनीगन्धा र ७ हजार ३४४ पिस तुलसी ल्याइ स्टोर गरिरहेको अवस्थामा फेला पारी चोरी तस्करी कार्यमा संलग्न रहेकाहरूलाई पक्राउ गरिएको हो ।
पक्राउ पर्नेहरूमा भोक्राहा नरसिंह गाउँपालिका ६ सुनसरीका २६ वर्षीय दीपक कुमार साह, २६ वीर्षीय गुरुदेव साह र विराटनगर ५ का ४२ वर्षीय अरुण यादव रहेका छन् ।
को १३ प ५०८५ नम्बरको मोटरसाइकलसहित उनीहरूलाई पक्राउ गरिएको प्रहरीले जनाएको छ । अवैध रजनीगन्धा र तुलसीसहित पक्राउ परेका तीनैजनालाई आवश्यक कारबाहीको लागि जिल्ला प्रहरी कार्यालय मोरङमा बुझाइएको छ ।
यसैगरी इलाका प्रहरी कार्यालय दुहबीबाट खटिएको गस्ती टोलीले दुहबी नगरपालिका २ स्थितमा अवैध रूपमा भारतबाट भन्सार छली, चोरी निकासी गरी नेपालतर्फ ल्याउँदै गरेको करिब १ लाख ६ हजार मूल्य बरावरको १८० पिस कुर्ता सुरुवाल बरामद गरी आवश्यक कारबाहीको लागि सुनसरी भन्सार कार्यालयमा बुझाएको प्रहरीले जनाएको छ ।
