इटहरी । जिल्ला प्रशासन कार्यालय सुनसरीमा मिटरब्याजीविरुद्व दुई सय ४९ जनाले उजुरी दर्ता गराएका छन् ।
सरकारले मिटरब्याजीविरुद्व उजुरी दिन आह्वान गरेसँगै दुई सय ४९ जनाले उजुरी दिएको जिल्ला प्रशासन कार्यालय सुनसरीले जानकारी दिएको हो ।
वैशाख १७ गते उजुरी आह्वान गरिएकोमा जेठ ८ गतेसम्ममा दुई सय ४९ जना मिटरब्याजी पीडितले उजुरी दिएको प्रमुख जिल्ला अधिकारी हुमकला पाण्डेले जानकारी दिइन् ।
प्रशासनले जारी गरेको सूचनामा मिटरब्याजीले गरेको ठगी र शोषणविरुद्ध आ–आफ्नो यथासम्भव बढी तथ्य प्रमाणसहित उजुरी दर्ता गर्न भनिएकोमा उजुरी दिने समयसीमाभित्र दुई सय ४९ जनाको जिल्ला प्रशासन कार्यालयमा आएको पाण्डेले बताइन् ।
सूचना जारी भएपछि मिटरब्याजको धन्दा सञ्चालन गर्ने गिरोह, व्यक्ति र संस्थाबाट पीडित भएको भन्दै सर्वसाधारणबाट दुई सय ४९ उजुरी परेको प्रशासनले जनाएको छ ।
यस्तै, दुईजना प्रतिनिधिविरुद्व पनि उजुरी परेको प्रशासनले जनाएको छ । प्रशासनका अनुसार इनरुवा नगरपालिका ६ का वडाध्यक्ष सुमन थापा र कोसी गाउँपालिका १ का वडाध्यक्ष सोभितनारायण यादव विरुद्व उजुरी आएको र त्यसमा आवश्यक कारबाहीको माग गर्दै उजुरी आएको प्रमुख जिल्ला अधिकारी पाण्डेले जानकारी दिइन् ।
प्राप्त भएको निवेदनमाथि प्रमाणका आधारमा पहिलो चरणमा पक्षहरूबीचमा छलफल गर्ने र त्यसपछि थप समन्वय गरी मुद्दा चलाउने तयारी भइरहेको प्रशासनले जनाएको छ ।
