इटहरी । इटहरीमा नयाँ घर बनाउँदा उपमहानगरपालिका आफैंले नक्सा बनाइदिने भएको छ ।
आगामी आर्थिक वर्षदेखि लागू हुनेगरी उपमहानगरपालिकाले भवन निर्माण आचारसंहिता अनुसार नगरबासीले घर बनाउँदा नगरपालिकाले नक्सा बनाइदिने तयारी गरेको हो ।
स्थानीयले भवनको नक्सा बनाउँदा चर्को शुल्क तिर्नुपरेको गुनासो आउन थालेपाछि उपमहानगरपालिकाले सहजीकरण गर्न लागेको नगरप्रमुख हेमकर्ण पौडेलले बताए ।
‘निवेदन दिएपछि नक्सा उपमहानगरपालिकाले नै बनाइदिन्छ,’ पौडेलले भने, ‘यसको तयारीमा उपमहानगर लागिसकेको छ, साउन १ गतेदेखि यो सेवा लिन पाउनेछन् ।’
भूकम्प प्रतिरोधी घर निर्माणमा स्थानीयलाई जागरुक बनाउन उपमहानगरपालिकाले नै चाहेअनुसारको नक्सा बनाइदिन लागेको मेयर पौडेलले बताए ।
निजी इन्जिनियरिङ कन्सल्टेन्सी मार्फत घरको डिजाइन बनाउँदा धेरै महँगो शुल्क तिर्नुपरेको गुनासो आउन थालेपछि सहुलियत दरमा अब उपमहानगरपालिकाले नक्सा बनाइदिने तयारीमा लागेको मेयर पौडेलले बताए ।
