काठमाडौ । आइतबार बसेको प्रतिनिधि सभाको बैठकमा संवैधानिक परिषद् सम्बन्धी विधेयक पेस भएको छ ।
प्रतिनिधि सभाको बैठकमा प्रधानमन्त्री पुष्पकमल दाहाल ‘प्रचण्ड’को तर्फबाट सञ्चार तथा सूचना प्रविधि मन्त्री रेखा शर्माले ‘संवैधानिक परिषद् (काम, कर्तव्य, अधिकार र कार्यविधि) सम्बन्धी (पहिलो संशोधन) विधेयक, २०७९ माथि विचार गरियोस भनी प्रस्ताव प्रस्तुत गरिन ।
सदनमा विधेयक पेस भएपछि प्रतिनिधि सभाका सदस्यले उठाएका प्रश्नको जवाफ सञ्चारमन्त्री शर्माले दिईन । त्यसपछि सभामुखले विधेयक दफावार छलफलका लागि सदनमा निर्माणार्थ प्रस्तुत गरे । उक्त विधेयकलाई विचार गरियोस् भन्ने प्रस्तावलाई सदनले छलफलका लागि पारित गरे लगत्तै सभामुख देवराज घिमिरेले संशोधन प्रस्ताव पेस गर्न सांसदलाई ७२ घण्टाको समय दिएका हुन ।
त्यस्तै, आइतबारकै बैठकमा प्रधानमन्त्रीको एवम् कानुन, न्याय तथा संसदीय मामिलामन्त्रीको तर्फबाट सञ्चार मन्त्री शर्माले ‘बेपत्ता पारिएका व्यक्तिको छानबिन, सत्य निरूपण तथा मेलमिलाप आयोग (तेस्रो संशोधन विधेयक, २०७९ माथि विचार गरियोस्’ भनी प्रस्ताव पेस गरेकी छन ।
सो प्रस्तावमाथि छलफल जारी छ ।
