इटहरी । ओखलढुंगामा कोशी प्रदेशका मुख्यमन्त्री हिक्मतकुमार कार्की चढेको गाडीमा आक्रमण भएको छ ।
ओखलढुंगाको सदरमुकाम गोरुमारेभञ्ज्याङमा पहिचान पक्षधरहरुले ओखलढुंगा सदरमुकाममा कार्यक्रम सकेर तलुवाको सामुदायिक भवन उद्घाटन गर्न जाने क्रममा पहिचान पक्षधरहरु एक्कासि आक्रमणमा उत्रिएका थिए ।
कोशी प्रदेशको नाम सच्याउन माग गर्दै प्रदर्शनमा रहेका उनीहरुले मुख्यमन्त्री सवार गाडीको झण्डा भाँचेर फालिदिएका थिए ।
मुख्यमन्त्री सवार गाडी अन्य क्षति हुनबाट भने जोगिएको छ । कोशी प्रदेशका उर्जा, खानेपानी तथा सिंचाइमन्त्री तिलकुमार मेयाङ्बोसहित आउनुभएका मुख्यमन्त्री कार्कीले ओखलढुंगामा प्रदेश सरकारबाट निर्माण हुने र निर्माण सम्पन्न भएका ८ वटा विकासका संरचना शिलान्यास, हस्तान्तरण तथा उद्घाटन गर्नुभएको थियो ।
उहाँले रुम्जाटार लामा क्वार्टर गुम्बा उद्घाटन गर्दै सबैको सहमतिमा नै पहिचानबाटै प्रदेशको नाम कोशी राखिएको र उक्त नाम संशोधन नहुने स्पष्ट गर्नुभएको थियो ।
