इटहरी । देशभरको क्याम्पस यति बेला आसन्न चैत ५ गते हुने स्वतन्त्र विद्यार्थी युनियनको चुनावमा होमिएका छन् । क्याम्पसमा स्थापित निर्वाचन अधिकृतको कार्यालय निर्वाचनलाई सौहार्दपूर्ण वातावरणमा सम्पन्न गर्ने तयारी गरेको छ भने, कार्यालयमा दर्ता भएका विद्यार्थी सङ्गठनहरू नतिजा आफ्नो पक्षमा पार्ने योजनाका साथ चुनावी गतिविधिहरू गरिरहेका छन् ।
क्याम्पसहरूमा आवस्यक्ताअनुसार गठबन्धनका साथ सबै विद्यार्थी सङ्गठनहरू चुनावी मैदानमा छन् । यो चुनावमा नेपाल विद्यार्थी संघ र अखिल नेपाल राष्ट्रिय स्वतन्त्र विद्यार्थी युनियन बिच मुख्य प्रतिस्पर्धा देखिने आङ्कलन गर्न सकिन्छ । यी मुख्य सङ्गठनले आवस्यक्ताअनुसार मोर्चा बनाएर चुनावमा होमिएका छन् ।
सुनसरीको इटहरीमा रहेको जनता बहुमुखी क्याम्पसमा पनि चुनावी गतिविधिहरू तीव्र बनाइएको छ । मुख्यरुपमा यहाँ नेपाल विद्यार्थी सङ्घको नेतृत्वमा एउटा मोर्चा मैदानमा छ भने अखिल नेपाल राष्ट्रिय स्वतन्त्र विद्यार्थी युनियनको नेतृत्वमा अर्को मोर्चा रहेको छ । नेपाल विद्यार्थी संघले समाजवादी विद्यार्थी युनियनसङ गठबन्धन गर्दै चुनावी अभियानलाई तीव्रता दिएको छ ।
नेविसंघका इकाई सभापति सहदेव काफ्लेले नेतृत्व गरेको गठबन्धनले आफ्नो शतप्रतिशत नतिजा आउने दाबी गरेका छन् । विद्यार्थीहरूका हरेक समस्यासँग केन्द्रित भएका सङ्गठनसँग तालमेल भएकाले आफूहरूको जीत निश्चित रहेको कोषाध्यक्ष पदका उम्मेदवार विपिन भट्टराईले बताए ।
विद्यार्थीका लागि जनता क्याम्पसमा आवश्यक पर्ने श्रोत पर्याप्त रहेको उल्लेख गर्दै त्यसलाई जगेर्ना गर्दै पर्याप्त उपलब्धि हासिल गर्नका लागि आफूहरूको उम्मेदवारी रहेको सचिव पदका उम्मेदवार अर्जुन राईले बताए । उनले भने, ‘सुधार गर्नु पर्ने धेरै कुराहरू पनि रहेका छन् त्यसलाई नेतृत्वमा पुगेपछि सुधारको पहल गरिने छ ।’
विचारमा प्रखर, डाइनामिक लिडर
सभापति पदका उम्मेदवार रहेका सहदेव काफ्ले विद्यार्थीमाझ लोकप्रिय मानिन्छन् । क्याम्पसमा आएका हरेक समस्याको समाधानका लागि पहल र प्रयत्न गरिरहने उनी आफूले निर्वाचन जित्नेमा ढुक्क रहेको बताउँछन् । ‘मेरो मत भनेको मैले यो क्याम्पसमा गरेका काम नै हो । उनले भने, मेरो नेतृत्वको टिमलाई विद्यार्थीहरूको मुल्याङकनका साथ निर्वाचित गराउनुहुने छ ।’
‘आजको समयमा जनता क्याम्पसलाई उत्कृष्ट बनाउन समग्र रूपमा हेर्न जरुरी छ । अब हामीले बनाउनु पर्ने भनेको अध्ययन गर्ने वातावरण हो । माहौल हो । म त्यसका लागि प्रतिबद्ध छु । म र मेरो नेतृत्वको टिमले जनता क्याम्पसमा एउटा फरक खाले सृजनात्मक शैक्षिक बतावरणको निर्माण गर्नेछ । जनताको क्याम्पसमा अब वास्तविक रूपमा पढ्ने वातावरण बन्नेछ ।’ उनले भनेका छन् ।
