रामधुनी । यस वर्षको प्रतीक्षित नेपाली चलचित्र ‘छक्कापञ्जा’ ४ को ट्रेलर सार्वजनिक भएको छ । तीन मिनेट २० सेकेण्ड लामो ट्रेलरले समसामयिक राजनीतिको प्रवृत्तिलाई प्रस्तुत गरेको छ ।
फिल्मको ट्रेलरले राजा नामक शीर्ष चरित्रले चारखाल सुधारगृहदेखि सिंहदरबारसम्म गरेको राजनीतिक यात्राको कथा प्रस्तुत गरेको छ । चुनाव सुरु भएसँगै राजा नामक पात्र सुधार गृहबाट निस्कन्छ र नेताको लागि भोट माग्न थाल्छ । एकीकृत निष्पक्ष दलका उम्मेदवार दिग्विजय सिंहलाई भोट माग्दै राजा पात्र चुनावमा होमिएको देख्न सकिन्छ ।
गुण्डागर्दीदेखि नेतासम्मको राजा नामको चरित्रको यात्रालाई ट्रेलरमार्फत प्रस्तुत गरिएको छ । कपाल पालेर सुधार गृहबाट निस्किएको राजालाई नेताले आफ्नो चुनावी अभियानमा उपयोग गरेको दृस्य ट्रेलरमा देख्न सकिन्छ । नेताको सिंढी चढेर ऊ कसरी केन्द्रीय राजनीतिमा स्थापित हुन्छ भन्ने चित्रण चलचित्रको ट्रेलरमा देख्न सकिन्छ । ट्रेलरको अन्त्यमा राजा र उसका साथीहरुको चरित्रमा आएको रुपान्तरण र आत्मबोधको स्वीकारोक्तिमार्फत निष्ठाको राजनीति अझै बाँकी छ भन्ने सन्देश प्रस्तुत गरिएको छ ।
फिल्ममा राजा पात्रको भूमिका दीपकराज गिरीले गरेका छन् भने अभिनेत्री बेनिशा हमाल पत्रकारको भूमिकामा छिन् । ट्रेलरमा पत्रकार र नेताबीचको सम्बन्धलाई पनि प्रस्तुत गरिएको छ । दीपाश्री निरौलालाई दीपकराज अर्थात् राजाकी पत्नीको भूमिकामा प्रस्तुत गरिएको छ । नीर शाह, अनुरागमान सिंह कुँवर, निर्मल शर्मा, मलिना जोशी, राज आचार्य पनि फिल्ममा महत्वपूर्ण भूमिकामा रहेका छन् ।
हेमराज बीसी निर्देशित फिल्म फागुन १९ गतेदेखी देशभरका हलहलमा प्रदर्शन हुँदैछ । चलचित्र आमा सरस्वती मुभिज र आईएमईको ब्यानरमा निर्माण भएको हो ।
