विराटनगर/ मोरङ क्षेत्र नम्बर ६ ९ख० का प्रदेशसभा सदस्यका उम्मेदवार केदार कार्कीले चुनावी प्रचारलाई तीव्र बनाएका छन् ।
प्रदेश सरकारका आन्तरिक मामिला तथा कानुनमन्त्रीसमेत रहेका कार्कीले चुनावी प्रचारसँगै घरदैलो अभियानलाई तीव्रता दिएका हुन् । मतदाताको घरघर पुगेर उनले भोट मागिरहेका छन् । उनले पाँच वर्षमा आफूले गरेको काम र प्रदेशसभामा खेलेको भूमिकाका विषय मतदातालाई जानकारी गराइरहेका छन् । चुनावी प्रचारमा भेटिएका मतदाताले समेत प्रदेशसभामा कार्कीको उपस्थिति जरुरी रहेको बताएका छन् ।
विराटनगर–१२ का मतदाता सुधीर पौडेल भन्छन्, “केदार दाइले सुकुम्बासीका लागि सम्पन्न वस्ती बसाउनेदेखि धुदुवा छेउको चार लेन सडक निर्माणको प्रारम्भमा योगदान दिनु भएको छ ।” कार्कीले प्रदेशसभामा समेत महत्वपूर्ण भूमिका निर्वाह गरेको उनको बुझाइ छ । कार्की निडर र हक्की युवा नेता भएको ।
त्यस्तै अर्की मतदाता लक्ष्मीदेवी पासवानले पनि कार्कीलाई जनताको दुःखसुखको साथीका रुपमा लिएकी छन् । उनले समस्या पर्दा सबैभन्दा पहिला सम्झने जनप्रतिनिधि नै कार्की हुन् । पासवानकी छोरी बिरामी हुँदा कार्कीकै पहलमा विराट मेडिकल कलेजमा उपचार गराइन् । विराटनगर–१२ मलंगुवाका मतदाता रामभरोस सहनी कार्कीप्रति प्रभावित छन् । बाढी आउँदा राहत लिएर कार्की आएको उनी सम्झँछन् । सहनी भन्छन्, “भोट माग्न त धेरै आउँछन् तर केदार कार्कीलाई नै भोट हाल्ने हो ।”
कार्की पनि आफू जनताको सेवक भएका कारण सहजै जित्ने दाबी गर्छन् । “म त सामान्य व्यक्ति हुँ । संघर्ष गरेर यहाँसम्म आएको हुँ । जनताका समस्या मलाई थाहा छ,” कार्की भन्छन्, “मैले गरेको काम नै जितको आधार हो ।” राजनीतिलाई आफूले सेवाका रुपमा लिएको बताउँदै कार्कीले जहिले पनि जनताको सेवामा समर्पित हुने बताए ।
