रामधुनी । युवा नेता रोहित सुब्बा यतिबेला क्याल्कुलेटर लिएर घरघर धाइरहेका छन् । यतिवेला उनी प्रदेशसभा सदस्यको लागि मत माग्ने दौडधुपमा रहेका छन् ।
आसन्न मंसिर ४ गते हुने संघ तथा प्रदेशसभा चुनावको लागि सत्ता गठबन्धनले सिट बाडफाड गर्दा सुनसरीको प्रतिनिधिसभा निर्वाचन क्षेत्र नम्बर १ मा माओवादी केन्द्रका मुक्साहाङ मेन्ह्याबो उमेदवार बनेका छन् भने प्रदेशसभा (क) मा नेपाली कांग्रेसका उमेश थापा र (ख) मा एकीकृत समाजवादीका रेवतीरमण राईलाई उमेदवार बनाइएको छ ।
यसअघि प्रदेशसभा (क) तर्फ माओवादी केन्द्र र (ख) तर्फ नेपाली कांग्रेसलाई अघि बढाइने बुझिएको थियो । यद्यपि सिट मिलानका क्रममा त्यसो नगरिएपछी प्रदेशसभा (ख) बाट नेपाली कांग्रेसका नेता रोहित सुब्बाले विद्रोह गर्दै उम्मेद्बारी मनोनयन गरे । सुब्बाले भनेका छन्, मैले विद्रोह गर्नुपर्ने थुप्रै कारणहरू छन् तर पनि गठबन्धनको सिट बाडफाड चित्तबुझ्दो नहुनु प्रमुख कारण हो ।
यतिबेला यस क्षेत्रमा मूख्यत तीनजनाबीचमा कडा प्रतिस्पर्धा हुने जानकारहरूको बुझाइ छ । सत्ता गठबन्धनका रेवतीरमण राई, बिपक्षी गठबन्धनका बिजय राई (एमाले) र विद्रोही उमेदवार रोहित सुब्बाबीचमा प्रतिस्पर्धा हुने जानकारहरू बताउँछन् ।
उसो त रोहित सुब्बा एक युवा उमेदवार हुन् । रामधुनीको बक्लौरीमा बसोबास गर्दै आएका सुब्बाको समाजसेवीको रूपमा छवि रहेको छ । खासगरी युवापंक्तीमा उनको अब्बल सहभागिता रहने गर्दछ । नेपाली कांग्रेसका महाधिवेशन प्रतिनिधि र नेपाल तरुण दलका सुनसरी जिल्ला उपाध्यक्ष समेत रहेका सुब्बालाई युवाहरूको राम्रो साथ रहेको देखिन्छ ।
राजनीतिमा प्रष्ट बिचार राख्ने र राजनीतिलाई समाजसेवाका रूपमा व्याख्या गर्न रुचाउने सुब्बा आफूले चुनाव जित्ने विश्वास व्यक्त गर्ने गरेका छन् । नेकपा एमाले नेतृत्वको गठबन्धन र कांग्रेस नेतृत्वको गठबन्धनका समर्थकहरूले समेत मत दिएर आफूलाई जिताउने उनको विश्वास रहेको छ । उनले भने, यस क्षेत्रका आम मतदाताले यसपटक पार्टी नहेरी योग्य, सक्षम युवा उमेदवारलाई मत दिएर जिताउनुहुन्छ भन्ने अपेक्षा छ ।
