इलाम । प्रदेश नं १ आन्तरिक मामिला तथा कानून मन्त्रालयबाट सञ्चालित सगरमाथा टिन्स क्लब(एसटीसी) बाट सञ्चालित सगरमाथा टिन्स क्लबको म अघि बढ्छु कार्यक्रम मार्फत इलाममा एसटीसी मीट तथा टी–सर्ट, ब्याच वितरण कार्यक्रम आयोजना गरिएको छ ।
प्रमुख जिल्ला अधिकारी माधव प्रसाद ढुङ्गानाको प्रमुख आतिथ्यतामा सम्पन्न कार्यक्रममा सहभागी विद्यार्थीहरूलाई लागु औषध दुर्व्यसनी तथा विपद् व्यवस्थापनमा सचेत गराइएको कार्यक्रमका प्रदेश संयोजक रामचन्द्र कोइरालाले जानकारी दिए ।
नेपालमा कुल जनसङ्ख्याको लगभग १३ प्रतिशत बालबालिकाहरू लागु औषध दुर्व्यसनीमा फसिरहेको तथ्याङ्क प्राप्त भइरहेका बेला कक्षा नौ देखि १२ सम्म अध्ययन गर्ने बालबालिकालाई लक्षित गरेर सचेतनामूलक कार्यक्रम तथा प्रतियोगिताहरू गराई सचेत गराइन्छ ।
यी बालबालिकाहरूले आफूभन्दा साना र ठुलालाई पनि सिकेका कुराहरू आदानप्रदान गर्न सक्ने भएकाले कार्यक्रम विद्यार्थी केन्द्रित बनेको संयोजक कोइराला बताउँदछन् ।
कोइरालाका अनुसार कार्यक्रम सञ्चालन भएका जिल्लामा टिन्स क्लब गठन गरी विद्यालयका अतिरिक्त क्रियाकलापसँग समेत जोडेर कार्यक्रम सञ्चालन भइरहेको छ । जिल्लाहरूमा तोकिएका संयोजकहरूले क्लब गठन गराएर कार्यक्रमलाई अगाडि बढाएको कोइरालाले बताए ।
