विराटनगर । मोरङका दुई स्थानबाट २ जना नक्कली चिकित्सकलाई प्रहरीले पक्राउ गरेको छ । चिकित्सा शिक्षा सम्बन्धी शैक्षिक योग्यता प्राप्त नगरेका र कानून बिपरित क्लिनिक संचालन गरी चेकाजाँच गर्ने गरेका २ जनालाई प्रहरीले पक्राउ गरेको हो ।
पक्राउ पर्नेमा पथरी शनिश्चरे नगरपालिका १ मा र श्री राम पाईल्स क्लिनिक संचालक भारत दार्जिलिङ रानिगन्ज पानसालीका २७ बर्षीय पर्सनजित बर्मन र सुन्दरहरैचा नगरपालिका ३ गछिया चौकमा कल्पना आयुर्वेदिक क्लिनिक संचालक भारत दार्जिलिङ देवीगन्ज ग्रामपन्चायतका २९ बर्षीय सनोड मण्डल रहेका छन् ।
उनीहरुले बिगत केही समय देखी आफु चिकित्सक भएको बताउँदै अबैध रुपमा क्लिनिक संचालन गर्दे आएका थिए । अबैध रुपमा क्लिनिक संचालन गरी आम नागरीकहरुको स्वास्थ्यमा खेलवाड गरेको आरोपमा उनीहरुलाई जिल्ला प्रहरी कार्यालय मोरङले उपचारमा प्रयोग गरिएको सामाग्री सहित पक्राउ गरेको तथा मेडिकल काउन्सिलसँग समन्वय गरी ईलाज सम्बन्धी कसूरमा थप अनुसन्धान भईरहेको जनाएको छ ।
