विराटनगर । तराईका आदिवासी समुदायले मनाउने महान् चाड सिरुवा पर्वको अवसरमा प्रदेश १ का मुख्यमन्त्री राजेन्द्रकुमार राईले शुभकामना व्यक्त गरेका छन् ।
मुख्यमन्त्री राईले एक शुभकामना सन्देश जारी गर्दै सिरुवा पर्वको सुखद अवसरमा प्रदेश १ र देश, विदेशमा बस्ने दाजुभाइ, दिदीबहिनीहरू सहित सम्पूर्ण नेपालीहरूमा सुख, शान्ति, सुस्वास्थ्य, दीर्घायु एवं प्रगतिको शुभकामना व्यक्त गरेका छन् ।
सिरुवा पर्व नयाँ वर्षसँगै मनाउन सुरु गरिन्छ । प्रदेश १ का झापा, मोरङ सुनसरी, उदयपुर सहित सप्तरी, सिराहा लगायत जिल्लामा सिरुवा पर्व धूमधामका साथ मनाइन्छ । तराईमा बस्ने आदिवासी राजवंशी, थारु, कोचे, मेचे, उराँव, किसान, धिमाल, ताजपुरिया, गनगाई र माझी समुदायले सिरुवा पर्व मनाउने गर्दछन् । यो पर्वलाई समय परिवर्तनको सङ्केतको रूपमा पनि मनाउने गरिन्छ ।
