विराटनगर । मोरङमा बालिकाको हत्या भएको एक सातापछि प्रहरीले घटनामा संलग्न भएको आशंकामा २ जनालाई पक्राउ गरेको छ।
रंगेली नगरपालिका २ नहर टोलमा २१ महिने बालिका हत्या प्रकरणमा संलग्न रहेका दुई जनालाई प्रहरीले पक्राउ गरी सोमबार सार्वजनिक गरेको हो।
पक्राउ पर्नेहरुमा सोही टोलका ४६ वर्षीय सैनी उराव र ३५ वर्षीया संगिता उराव रहेका छन् । गत मंसिर २८ गते चन्द्र उरावको छोरी युनिसा उरावको शव घर नजिकैको पैनीमा गाडेको अवस्थामा फेला परेको थियो ।
पक्राउ परेकाहरुलाई जिल्ला अदालत मोरङबाट कर्तब्य ज्यान कसुरमा ५ दिन म्याद थप गरी अनुसन्धान सुरु गरेको जिल्ला प्रहरी कार्यालय मोरङका प्रहरी नायब उपरीक्षक एवं प्रवक्ता दिपक श्रेष्ठले जानकारी दिए । घटनाको विषयमा थप अनुसन्धान भइरहेको प्रवक्ता श्रेष्ठले बताए ।
प्रहरीका अनुसार चन्द्रकी छोरी युनिसा मंसिर २६ गतेबाट बेपत्ता भएकी थिइन्। छोरी बेपत्ता भएपछि बुबा चन्द्र र परिवारले निरन्तर दुई दिन खोजी गरेका थिए। खोजी गर्ने क्रममा २८ गते उनीहरुले घर नजिकको पैनीमा खाडल खनेको भेटाएका थिए।
त्यसपछि प्रहरीलाई खबर गरी खाडल खन्दा बालिकाको शव भेटिएको थियो। युनिसाको शव भेटिएको स्थान घरबाट करिब ६० मिटरको दुरीमा रहेको प्रहरीले जनाएको छ।
