रामधुनी । संस्कृतमा ‘जिवित पुत्रिका’ हिन्दीमा जियतिया र नेपालमा तराइवासी मधेशी महिलाहरू ‘जितिया’लाई आफ्नो सन्तानको सुख, आनन्द र प्रगतिका निमित्त मनाइने एउटा उत्साहजनक चाडका रूपमा लिन्छन् र यसलाई जिवित पुत्र पर्वको रूपमा मनाइन्छ । यो पर्व अश्विनको अष्ठमी तिथीको कृष्ण पक्षको दिन मनाइन्छ । यो पर्व खासगरि आमाहरूले आफ्नो जिवित पुत्रहरूकालागि व्रत बस्ने गर्दछन् । महिलाहरु ’निर्जला’ अर्थात पानी समेत सेवन नगरिकन २४ घण्टासम्म भगवान ’जीतमहान गोँसाई’को पूजाआजा गरी कठोर व्रत बस्ने परम्परा रहि आएको छ ।
थारु समुदायको महान पर्व जितियालाई लक्षित गर्दै सुनसरीको रामधुनी नगरपालिका झुम्कामा साँस्कृतिक कार्यक्रम सहित जितिया महोत्सव हुने भएको छ । आगामी असोज १३ गते बुधबारका दिन झुम्का बजारमा जितिया महोत्सव तथा साँस्कृतिक कार्यक्रम हुने भएको हो ।
थारु चलचित्र तथा साँस्कृतिक संघले आइतबार पत्रकार सम्मेलको आयोजना गर्दै थारु समुदायले परापुर्वक कालदेखि जितियालाई हर्ष उल्लास साथ मनाउदै आईरहेको र प्रदेश १ मा सुनसरीले पहिलो पटक जितिया उत्सव तथा साँस्कृतिक कार्यक्रमको आयोजना गर्न लागेको संघकी अध्यक्ष जानकी चौधरीले जानकारी दिइन् ।
चार्डपर्व, परम्परा र संस्कृति समुदायको पहिचान भएकाले कोरोनाका कारण गत वर्ष मनाउन नपाए पनि यस वर्ष भव्यताका साथ मनाउन लागेको उनले बताइन् । थारु साँस्कृतिक कार्यक्रममा थारु सांस्कृतिक लोक नृत्य, झाँकी, धुमरा नाच लगायत चर्चित गायक र गायिकाको प्रस्तुति समेत रहने थारु चलचित्रका महानायक परशुराम चौधरीले पत्रकार सम्मेलनमा जानकारी दिए ।
पत्रकार सम्मेलन कार्यक्रममा थारु चलचित्रका महानायक परशुराम चौधरी, निर्माता रेनु चौधरी, थारु जागरण अभियान सुनसरीकी तारादेवी चौधरी लगायत थारु चलचित्रकर्मी, पत्रकारको उपस्थिति रहेको थियो ।
