इटहरी । मोरङ बेलबारीका रूपक घिमिरे र सुनसरी इटहरीका दीपेश कट्वाललाई दाजुभाइ भन्दा फरक पर्दैन । बैंलोर भारतमा होटेल म्यानेजमेन्ट पढ्न गएका रूपकको करिब ४ वर्ष अघि दीपेशसंग घरायसी सम्बन्धमार्फत नै चिनजान भएको हो । यो सम्बन्ध अहिले रेस्टुरेन्ट सञ्चालकसम्म आइपुगेको छ ।
धेरैलाई पढेर के गर्ने भन्ने विषय सोचनीय पनि बन्ने गर्छ । तर, होटेल म्यानेजमेन्ट पढ्न बैंलोर गएका रूपकले श्रीमती सीमा पराजुली र दिदी सृजना पराजुली सहितको सहभागितामा स्वदेशमै केहि गर्न सकिन्छ भन्ने चित्र देखाएका छन् । अर्कोतर्फ दीपेश आइटी क्षेत्रका हुन । श्रीमती सृजना नर्सिङ !
साथिकै सम्बन्धले दुवैको घरबार पनि बन्यो भने, अहिले चारै जनाको सक्रियतामा इटहरीमा डुङ्गा रेस्टुरेन्ट सञ्चालनमा आएको छ ।
स्वदेशमै केही गर्ने सोचका साथ करिब ५० लाखको लागतमा इटहरी १७ मा उनीहरूले डुङ्गा रेस्टुरेन्ट सञ्चालनमा ल्याएका हुन् । गत श्रावण २२ बाट औपचारिक रूपमा उद्घाटन भएको रेस्टुरेन्टले आन्तरिक मात्रै होइन बाहिरी पाहुनालाई पनि आकर्षित बनाएको उनीहरूले बताएका छन् ।
‘बैंलोरमै हामीले धेरै कुरा सिक्यौँ, त्यहाँका रेस्टुरेन्ट पनि हेर्यौं, अनि नेपालमै केही गर्नुपर्छ भन्ने लाग्यो सिमाले भनिन्, अनि हामीले सरसल्लाह गरेर यस्तो योजना बनाएका हौँ।’ मौलिक पहिचान सहितको रेस्टुरेन्टमा अन्यमा भन्दा नयाँपनको झल्को आउने उनको भनाई छ ।
समुन्द्रमा डुङ्गामा बसे जसरी नै एक पहिचान सहितको रेस्टुरेन्ट स्थापना गरेको दीपेशको भनाई छ । ‘म आफै पनि आइटी क्षेत्रको हो । नाम जुराइसकेपछि सबै डिजाइनिङ गर्ने गरेँ, आ–आफ्नो क्षेत्रका भएकाले हामीलाई सहज भयो, सिप पनि देखियो।’ उनले भने ।
पर्यटकलाई आकर्षित गर्ने र व्यवसायका माध्यमबाट देशको आर्थिक स्थितिलाई पनि उकास्ने उद्देश्यका साथ स्थापित रेस्टुरेन्टले महामारीका बेला पनि १० जनालाई रोजगारी प्रदान गरेको छ ।
अर्कोतर्फ विदेश जान लगानी गर्ने पैसाले स्वदेशमै केही गर्न सकिन्छ भन्ने उदाहरण उनीहरूले पेस गरेका छन् ।
