रामधुनी । आफ्नै अनुयायीमाथि बलात्कारको आरोप लागेका सिद्धबाबा भनिने कृष्णबहादुर गिरीलाई थुनामा राख्न उच्च अदालत विराटनगरले दिएको आदेशलाई सर्वोच्च अदालतले पनि सदर गरेको छ ।
सुनसरीको चतराधामका गिरीलाई जबरजस्ती करणी मुद्दामा थुनामा राख्न उच्चले दिएको आदेश सर्वोच्चले पनि सदर गरेको हो । सर्वोच्चले आदेश सदर गरेसँगै मुद्दाको किनारा नलागेसम्म उनी कारागारमै थुनामा रहनुपर्ने छ ।
आफूलाई गैरकानुनी रुपमा थुनामा राखिएको भन्दै गिरी उच्च अदालतको आदेश बदरको माग गर्दै सर्वोच्चमा पुगेका थिए । सर्वोच्चका न्यायाधीशद्धय आनन्दमोहन भट्टराई र प्रकाश ढुंगानाको संयुक्त इजलाशले उच्चकै आदेश सदर गरिदिएको हो ।
दीक्षा दिने भन्दै मध्यरातमा बोलाएर सुनसरीको चतराधामस्थित आफ्नै आश्रममा २०७६ कात्तिक ४ गते बलात्कार गरेको किटानी जाहेरी एक महिला अनुयायीले दिएपछि गिरीमाथि सुनसरी प्रहरीले जबरजस्ती करणी मुद्दामा अनुसन्धान थालेको थियो । सुरुमा जिल्ला अदालत सुनसरीले तीन लाख रुपैयाँ धरौटीमा छाड्न आदेश दियो ।
तर पीडितले न्याय नपाएको भन्दै मुद्दा उच्च अदालत विराटनगरमा पुग्यो । उच्चले भने सुनसरी अदालतको आदेश बदर गरेर थुनामा राख्न आदेश दिएको थियो । त्यसमाथि सर्बोच्चले पनि थुनामै राख्ने आदेश सदर गरेपछि उनी कारागारमा बन्दी जीवन बिताइरहेका छन् ।
