काठमाडौं । पछिल्लो २४ घण्टामा देशभर ३ हजार ४ सय ३९ जना संक्रमित थपिएसँगै नेपालमा सक्रिय कोरोना संक्रमितको संख्या २५ हजार नाघेको छ।
यसअघि स्वास्थ्य तथा जनसंख्या मन्त्रालयले सक्रिय संक्रमितको संख्या २५ हजार नाघेमा लकडाउन गर्नुपर्ने सिफारिस सिसिएमसी र मन्त्रिपरिषदमा गरेको थियो। स्वास्थ्य तथा जनसंख्या मन्त्रालयले कोरोना संक्रमणको दर तीव्र गतिमा बढेको निचोडसहित फेरि एक महिना सबै सार्वजनिक सेवा र व्यवसाय बन्द गर्न पनि सिफारिस गरेको थियो।
स्वास्थ्य मन्त्रालय अन्तर्गतको इन्सिडेन्ट कमाण्ड सिस्टमको बसेको बैठकले फेरि एक महिना सबै सार्वजनिक सेवा र व्यवसाय बन्द गर्न सिफारिस गरे पनि अब त्यस अनुसार अघि नबढ्ने रणनीति सरकारले बनाएको छ।
अस्पतालमा कोरोना संक्रमितको उपचार गर्न बेड उपलब्ध हुन्जेल लकडाउन नगर्ने स्वास्थ्य मन्त्रालयका प्रवक्ता प्रा.डा. जागेश्वर गौतमले बताए।
