रामधुनी । प्रदेश १ बाट संचालित प्रदेशकै लोकप्रीय रेडियो सप्तकोशी एफ एमका प्रधान सम्पादक लिलाराज भट्टराईले मृत्युपर्यन्त आँखा र छाला दान गर्ने घोषणा गरेका छन् ।
आफ्नो जन्मदिनको अबसर पारेर उनले आफ्नो जीवन पछि पनि अरु कसैले आँखा वाट सुन्दर संसार देख्न र छाला वाट जलन भएका चार जनाले उपचार प्राप्त गर्न सकुन भन्दै यस्तो घोषणा गरेका हुन् ।
साथै उनले छोरा विक्रान्त र छोरी(भजिती) खुशीको जन्म दिनको अवसर पारेर एक एक जना अनाथ वालवालिकालाई वर्षदिनभरि पुग्ने झोला, कापी र कलम प्रदान गर्ने पनि प्रतिवद्धता ब्यक्त गरेका छन् ।
दुइ दशक भन्दा धेरै समय अघिबाट पत्रकारीता पेशामा सक्रिय भट्टराई प्रेस संगठन नेपाल एक नम्बर प्रदेश कमिटिका इञ्चार्ज छन् । उनी प्रदेश १ का रेडियो तथा टेलिभिजनबाट प्रसारण हुने कार्यक्रम ‘जनतासंग मुख्यमन्त्री’को प्रस्तोता पनि हुन ।
जन्मदिनको अवसरमा उनले लेखेको स्टाटस जस्ताको तस्तैः
कक्षामा प्रथम भएर घर फर्कदा हजुरआमा भन्ने गर्नुहुन्थ्यो औपचारिक शिक्षा पछि डाक्टर,इन्जिनियर,वकिल,पत्रकार के वन्न चाहेको वन्न सकिन्छ । तर महत्वपूर्ण कुरा अशल मान्छे वन्नु हो । अशल र इमान्दार वन्नु ।
मलाई जन्मदिने वुवा आमा,जीवनभर साथ दिने श्रीमति ,गुरु र अग्रजले पनि सधैभरी सेवा र शत्कर्मका लागि हौसला प्रदान गरिरहनुभएको छ । उहाँहरु प्रति हार्दिक आभार एवं कृतज्ञता प्रदान गर्दै आज असोज २ गते शुक्रवार मेरो जन्मदिनको अवसर पारेर मृत्यूपर्यन्त आँखा र छाला दान गर्ने घोषणा गर्दछु । मेरो आँखा वाट कसैले यो सुन्दर संसार देख्न सकुन । जलन भएका चार जनाले मेरो छाला वाट उपचार प्राप्त गर्न सकुन । साथै हाम्रो छोरा विक्रान्तको जन्मदिन असोज १० गते र छोरी (भजिती) खुशीको जन्म दिन पुष १४ को अवसर पारेर एक एक जना अनाथ वालवालिकालाई वर्षदिनभरि पुग्ने झोला,कापी र कलम प्रदान गर्ने प्रतिवद्धता ब्यक्त गर्दछु ।
