काठमाडौं । सरकारले अवस्था सामान्य भन्दै गएमा भदौ १६ गतेबाट कक्षा ११ को भर्ना प्रकृया सुरु गर्ने तयारी थालेको छ । कोरोना संक्रमण कम हुँदै गएमा भदौ १६ बाट भर्ना प्रकृया थाल्ने शिक्षा विज्ञान तथा प्रविधि मन्त्रालयका प्रवक्ता दिपक शर्माले जानकारी दिनुभयो ।
विद्यार्थीमा भर्ना बारे अन्योलता छाएको भन्दै यस विषयमा मन्त्रालय गम्भीर रुपले लागि परेको पनि उहाँको भनाई छ । एसइई परीक्षाको नतिजा प्रकाशित भएपछि विद्यार्थी कहिलेबाट भर्ना खुल्छ भन्दै अन्योलताका बीच बसेका छन । नयाँ पाठ्यक्रम तयार भएसँगै कक्षा ११ को भर्नामा भने, नयाँ व्यवस्था लागु भएको छ ।
विगतको झैँ भर्ना प्रकृया यस पटक हुने छैन । यसपटक कक्षा ११ मा विद्यार्थीलाई भर्ना गराउँदा मानविकी, शिक्षा शास्त्र लगायत संकायका आधारमा भर्ना लिन पाइने छैन । अब भर्ना हुँदा विद्यार्थीले ऐच्छिक विषय छनोट गर्नुपर्नेछ र कुनै पनि संकायको आधारमा त्यसलाई मान्यता दिइने छैन ।
शर्माका अनुसार नयाँ पाठ्यक्रम तयार भएसँगै कक्षा ११ मा तीनवटा अनिवार्य विषय र तीनवटा समूहबाट एक एक विषय ऐच्छिक गरी ६ वटा विषय अध्यापन गराइन्छ । विद्यार्थीले सातौँ विषयको रुपमा पनि अध्ययन गर्न पाउँछन तर, उनीहरुले चाहेको खण्डमा मात्रै लागु हुने छ ।
अब कक्षा ११ पनि विद्यालय मातहतमै सञ्चालन हुने भएकाले विद्यार्थी भर्ना प्रक्रिया पनि कक्षा ९ र १० को जस्तै गरी हुने छ । थाहाखबरबाट साभार
