इटहरी । कोरोना संक्रमित भएर होम आइसोलेसनमा वसेका ब्यक्तिहरुलाई हौसला प्रदान गर्न इटहरी उपमहानगरको तर्फवाट घर घरमै पुगेर भेटघाट सुरु गरिएको छ ।
उपप्रमुख लक्ष्मी गौतमले स्वास्थ्यकर्मीको टोली सहित घर घरमै पुगेर स्वास्थ्य अवस्थाको वारेमा जानकारी लिएकी छिन् । इटहरी अस्पतालका इमरजेन्सी इन्र्चाज रामकुमार धमला र हेल्थ असिस्टेण्ट धर्मानन्द भटट सहित उपमेयर गौतमले ११ जनाको घरमै पुगेर फलफूल,औषधी र गुर्जो सहित स्वास्थ्यलाभको कामना गरेका छन्।
आइतबार वडा नम्वर ४,५,६,९,१६ र १९ का गरि संक्रमित र निको भएका ११ जनालाई भेटेको उपप्रमुख गौतमले बताइन् । होम आइसोलेसनमा वस्दा स्वास्थ्यको मापदण्ड पूरा भए नभएको अनुगमन समेत गरिएको इमरजेन्सी इन्र्चाज राम प्रसाद धमलाले जानकारी दिए।
कोरोना संक्रमण भएर इटहरी ४ मा होम आइसोलेसनमा बसेकी प्रदेश सांसद कुसुम श्रेष्ठले इटहरीउपमहानगरकी उपप्रमुख, स्वास्थ्यकर्मीको टोली समेत आएर भेट गरेकाेमा खुशी लागेका प्रतिक्रिया दिइन् ।
संक्रमितहरुलाई समाजले हेर्ने दृष्टिकोण फरक भएको वेला स्थानीय सरकार घर घरमा पुगेर हौसला प्रदान गर्दा संक्रमितहरुलाई हाम्रो लागि सरकार रहेछ भनेर मनोवल वढने बताइन् ।
यस्तो कार्यले समाजले हेर्ने दृष्टिकोणमा पनि परिवर्तन ल्याउन सहयोग पुग्ने भएकाले अन्य स्थानीय तहले पनि इटहरी उपमहानरवाट सिक्नुपर्नेमा प्रदेश सांसद श्रेष्ठले जोड दिएकी थिइन् ।
कोरोना संक्रमण भएर निको भई होम आइसोलेसनमै रहेका इटहरी उपमहानगरका इन्जिनियर कैलाश तिम्सिनाले उपमेयर सहित स्वास्थ्यकर्मीहरुको टिम आएर हौसला वढाउने कार्य गरेकाेमा खुशी लागेको बताए ।
इटहरी उपमहानगर होम आइसोलेसनमा वसेका सवैका घरमा पुग्ने उपप्रमुख लक्ष्मी गौतमले बताइन्। इटहरीमा होम आइसोलेसनमा २५ जना रहेका छन ।
