इटहरी । कुनै पनि आर्थिक सहयोग नलिई नेपालका ४५ जिल्लासहित विभिन्न पालिकाहरूको भ्रमण गर्दै आएका अभियन्ता विनोद भट्टराईले आफ्नो अभियानलाई केही समयका लागि विश्राम दिने घोषणा गरेका छन् । रामधुनि मन्दिर तथा रामधुनि नगरपालिकाको धार्मिक, सांस्कृतिक र पर्यटन सम्भावनालाई राष्ट्रियस्तरमा चिनाउने उद्देश्यसहित उनले यो अभियान सञ्चालन गर्दै आएका थिए ।
अभियन्ता भट्टराईका अनुसार रामधुनिको पहिचान उजागर गर्न भिडियो सामग्री निर्माणका लागि आवश्यक उपकरण उपलब्ध गराइदिन नगरपालिकासँग गरिएको आग्रह कुनै पनि व्यक्तिगत स्वार्थका लागि नभई पूर्णतः सार्वजनिक हितका लागि थियो । प्रयोगपछि सम्पूर्ण सामग्री फिर्ता गर्ने प्रतिबद्धता उनले नगरपालिकाका कार्यपालिका सदस्यहरूसँगको बैठकमै स्पष्ट रूपमा राखेका थिए ।
तर नगरप्रमुख तथा उप–प्रमुखबाट अपेक्षित चासो र सहयोग नपाएकोप्रति उनले दुःख व्यक्त गरेका छन् । यद्यपि रामधुनि–४ वडा कार्यालय तथा आफ्नो वडा रामधुनि–३ बाट प्राप्त सहयोग र साथप्रति उनले विशेष आभार व्यक्त गरेका छन् ।
नगरपालिकाबाट सहयोग नपाए पनि आफूले यसलाई नकारात्मक रूपमा नलिएको उल्लेख गर्दै उनले अन्य स्थानका जनप्रतिनिधिहरूले आफ्नो अभियानको प्रशंसा गर्दै साथ, सम्मान र प्रोत्साहन दिएको अनुभव सुनाए ।
भविष्यमा आवश्यक स्रोत–साधन जुटाएर पुनः ७७ वटै जिल्लाको भ्रमण गर्ने लक्ष्यसहित अझ व्यवस्थित, प्रभावकारी र दीर्घकालीन रूपमा रामधुनिको प्रचार अभियानलाई निरन्तरता दिने दृढ संकल्प अभियन्ता भट्टराईले व्यक्त गरेका छन् ।
