इटहरी । नेपाली सिनेमामा फेरि एक पटक हलचल ल्याउने तयारीमा छन् चर्चित हास्य कलाकार केदार घिमिरे अर्थात् माग्ने ‘बुढा’। तर यस पटक उनी मागेर हँसाउने होइनन्, राजा बन्ने सपना बोकेर दर्शकमाझ आउँदै छन्। सोमबार सार्वजनिक भएको नयाँ नेपाली फिल्म ‘माग्ने राजा’ को टिजरले सार्वजनिक भएको केही समयमै दर्शकको मन जित्न सफल भएको छ।
चलचित्रको टिजरमा ‘माग्ने राजा’ ले एक सुरक्षा गार्डलाई केही रकम दिँदै भन्छन् “मानिस ठुलो पैसाले हुन्छ, लुगाले हुँदैन।” यो संवादले साधारण देखिने पात्रको ठुलो सोच, गरिबप्रति सम्मान र देशको अहिलेको अवस्थालई व्यङ्ग्य प्रकट गर्छ। हास्यको आवरणमा आएको यो पङ्क्तिले समाजमा गहिरो छाप छाड्छ ।
‘माग्ने बुढा’ टिजरमा देखिन्छन् एउटा यस्तो पात्रमा, जसले ‘राजा’ बन्न चाहन्छ तर गद्धी बस्न होइन, सिस्टम बदल्न। टिजर हेर्दा उनी देश बदल्ने सपना बोकेको क्रान्तिकारी नागरिक जस्तो देखिन्छन्।
राजा बन्न जनताको दिल जित्नुपर्छ, सिंहदरबारको सिँढी होइन भन्ने टिजरले सन्देश प्रस्ट दिन खोजेको देखिन्छ सत्ता जनताबाट आउनुपर्छ, सिंहदरबारबाट होइन भन्न खोजेको देखिन्छ । टिजरमा हास्य र व्यङ्ग्य दुबैलाई सन्तुलित रूपले मिसाएर, नेपाली समाजको वास्तविकता उजागर गरिएको छ। साधारण नागरिकको सङ्घर्ष राजनीतिक विडम्बना र सपना बोकेको पात्र यी सबैलाई टिजरले छरितो शैलीमा प्रस्तुत गरेको छ ।
ऋषि लामिछानेको निर्देशनमा तयार भएको फिल्ममा केदार, वर्षा र विल्सनसहित शिशिर वाङ्देल, शारदा गिरी, राधिका कँडेल, पवित्रा साकी (मिस पवी) लगायतको पनि अभिनय रहेको छ । आरम्भ प्रडक्सनको ब्यानरमा मुनाल घिमिरे प्रस्तुतकर्ता र मधुसूदन शर्मा निर्माता रहेको फिल्ममा नरेन्द्र मैनालीको छायाङ्कन, सामीप्यराज तिमल्सेनाको लेखन तथा मित्र गुरुङको सम्पादन रहेको छ ।
