इटहरी। कथानक नेपाली फिल्म रोल नं १ ले आफ्नो प्रचार अभियान पूर्वी नेपालबाट सुरु गरेको छ । फिल्म टोलीले झापा, मोरङ र सुनसरीका विभिन्न विद्यालयमा पुगेर विद्यार्थीसँग प्रत्यक्ष संवाद गर्ने योजना बनाएको छ । प्रचारको सुरुवाती चरणमै पूर्वका शहरलाई प्राथमिकता दिइएको हो ।
फिल्मको प्रचार नाराका रूपमा ‘हामी आउँदैछौँ तपाईंको कक्षाकोठामा, सुन्न तपाईंको मनका कुरा…’ तय गरिएको छ । साथै, फिल्मले आफूलाई “हरेक विद्यार्थीको कथा” भन्ने सन्देशसहित प्रस्तुत गरिरहेको छ ।
निर्माता विनोद पौडेलका अनुसार विद्यालयमा पुगेका कलाकारहरूसँग विद्यार्थीले फिल्मबारे उत्सुकता देखाउन थालेका छन् । उनले विद्यार्थीका अनुभव र विचार पनि सुन्न थालिएको बताए । प्रचार यात्रामा कलाकार मुकुन भुसाल, रेणु योगी र प्रशान्त शिवाकोटी सहभागी छन् ।
म्याग्दीको रुम गाउँमा छायांकन गरिएको फिल्मले शिक्षाका लागि संघर्ष गर्ने पात्रहरूको भावनात्मक कथा प्रस्तुत गर्छ । निर्माता पौडेलका अनुसार फिल्मले अहिलेको शैक्षिक प्रणाली र त्यसका अभ्यासमाथि प्रश्न उठाउने प्रयास गरेको छ । गलत शिक्षा प्रणालीले विद्यार्थीमा पारिरहेको असरलाई कथामार्फत देखाइएको उनको भनाइ छ ।
शिक्षासँग सम्बन्धित विषयवस्तु भएकाले प्रचार अभियान पनि विद्यालय केन्द्रित बनाइएको निर्माता पक्षले जनाएको छ । जोन योञ्जन निर्देशित यो फिल्म गणतन्त्र दिवसको अवसर पारेर जेठ १५ गतेदेखि देशभर प्रदर्शनमा आउने तयारीमा छ ।
फिल्ममा मुकुन भुसाल, सुशांक मैनाली, रेणु योगी र सिर्जना अधिकारी को मुख्य भूमिका रहेको छ । बाल कलाकारका रूपमा निर्भिक रेग्मी, रिन्चेन लामा, संयम कटुवाल र सिजल श्रेष्ठ देखिएका छन् ।
फिल्मका निर्माता विनोद पौडेल र जान्वी पौडेल हुन् भने सह-निर्मातामा छत्रमाया गिरी र रमेश चौलागाईं रहेका छन् । फिल्मको कथा तथा पटकथा महेश दवाडी ले तयार पारेका हुन् । छायांकन शिवराम श्रेष्ठ ले गरेका छन् ।
