इटहरी। भोजपुरको दिङ्लामा यस वर्ष पनि रथारोहण सहितको सदबीज छर्ने पुरातन परम्परामा सहभागी हुन भक्तजनको ठूलो भीड लागेको थियाे। मङ्सिर कृष्ण चतुर्दशीका दिन मनाइने बालाचर्तुदशीमा दिवंगत पितृहरूको उद्धारका लागि सात प्रकारका अन्न छर्ने चलन छ, जसलाई सतबीज छर्ने भनिन्छ।
यो दिनभर दिवंगत पितृहरूको नाममा दीप प्रज्वलन गरी रातभर जाग्राम बसेपछि बिहान सबेरै दीपदान र सात अन्न छर्ने विधि पूरा गर्ने प्रचलन रहँदै आएको छ। देशभरका पशुपति क्षेत्र तथा शिवालयहरूमा जस्तै दिङ्ला क्षेत्रमा पनि आज विशेष भीड देखिएको थियाे। स्थानीयका साथै टाढा–टाढाबाट समेत भक्तजन दिङ्ला आइपुगेका थिए।
वि.स. १९३२ मा आबाल ब्रह्मचारी बालगुरु षडानन्दले यहाँ रथारोहण सहित सतबीज छर्ने परम्परा सुरु गरेका थिए। षडानन्द गुरुकुल वेदविद्या आश्रमका गुरु खिलाराज कोइरालाका अनुसार नेपालभर रथयात्रा सहित सतबीज छर्ने परम्परा चलिआएको एक मात्र स्थान दिङ्ला हो। यही विशिष्टताका कारण पछिल्ला वर्षहरूमा यहाँ आउने भक्तजनको संख्या झनै बढ्दै गएको उनले बताए।
मोरङको सुन्दरहरैँचाबाट दिङ्ला पुगेका विजय पौडेलले आफ्ना आमाबाबुले बताए अनुसार सदबीज छर्नाले पितृको शान्ति तथा आशीर्वाद प्राप्त हुने विश्वास भएकाले दिङ्लासम्म आएको बताए।
