इटहरी । नेपाली चलचित्र ‘लडाइँ पहिचानको’ ले यतिबेला प्रचार–प्रसारलाई अभूतपूर्व गतिमा अघि बढाएको छ। दर्शकबीच प्रभावकारी उपस्थिति जनाउन निर्माण टिमले प्रचार संरचनालाई प्रदेशगत रूपमा बाँड्दै जिम्मेवारी तोकेको निर्देशक भीम लामाले जानकारी दिएका छन्।
उनका अनुसार बागमती प्रदेश तथा काठमाडौं उपत्यकाको मिडिया सल्लाहकार तथा प्रमोसन डिजाइनरको जिम्मेवारी रघुनाथ सापकोटालाई दिइएको छ भने बागमती प्रदेशको मिडिया संयोजक हिरोज लोप्चन हुनेछन्। त्यस्तै, काठमाडौं उपत्यकाको मिडिया संयोजक सागर सुब्बालाई तोकिएको छ।
कोशी प्रदेशतर्फ मिडिया सल्लाहकार तथा प्रमोसन डिजाइनरको जिम्मेवारी सुवास संकल्पलाई दिइएको छ भने मिडिया संयोजक मनोज दाहाल रहनेछन्। लुम्बिनी, कर्णाली र सुदूरपश्चिम प्रदेशमा भने रामचन्द्र पौडेललाई मिडिया संयोजकको जिम्मेवारी दिइएको छ। आवश्यकताअनुसार थप जिम्मेवारीहरू क्रमशः तोकिँदै जाने निर्देशक लामाले बताएका छन्।
यसैबीच, चलचित्रको डबिङ कार्य तीव्र गतिमा भइरहेको निर्माण पक्षले जनाएको छ। भीम लामा फिल्म्सको ब्यानरमा बनेको यो चलचित्रमा भारतीय रियालिटी शो ‘इन्डियन आइडल’ बाट चर्चित अभिनेता प्रशान्त तामाङ र नव–नायिका जेनी तामाङ मुख्य भूमिकामा छन्।
चलचित्रमा लोकप्रिय अभिनेत्री करिश्मा मानन्धर, धिरेन शाक्य, प्रेम सुब्बा, सुरबिर पण्डित, राजेन्द्र खड्गी, किशोर साम्बाहाम्फे, अरुणकुमार प्रधान, शार्मिला राई, पशुराम चौधरी, सुवास योञ्जन तामाङ, दिनेश कोइराला, दिलु सुब्बा, रामजी बिष्ट, नवीन म्यान्याङ्बो, पवि तेम्बे, रोशन शर्मा, छिरिङ शेर्पा, डम्बर कुमारी लिम्बु, अम्बिका ढकाल, सुदीप लिम्बुलगायतका कलाकारहरूको सशक्त अभिनय देख्न पाइनेछ।
यसमा नृत्य निर्देशन मीनकुमार लिम्बु र सानुराजा लिम्बुले गरेका छन् भने एक्सन निर्देशन देव महर्जनले गरेका छन्। छायांकन मदन घिमिरे कायस्थले गरेका हुन् भने सम्पादन रमेश विश्वकर्माले गरिरहेका छन्। चलचित्रको नेपालभर वितरणको जिम्मेवारी कुबेर सिने डिस्ट्रीब्युटरले लिएको छ।
निर्देशक लामा, दिलु सुब्बा, रामजी बिष्ट र उमेश तामाङ यस चलचित्रका निर्माता हुन्। ‘लडाइँ पहिचानको’ आउँदो मङ्सिर ५ गतेदेखि देशभर प्रदर्शन हुने निर्माण टिमले जनाएको छ।
