इटहरी । इटहरीस्थित किराँत राई यायोक्खा भवनमा ‘सापित’ फिल्मको पहिलो प्रिमियर भव्यतापूर्वक सम्पन्न भएको छ। इटहरी, धरान तथा आसपासका कलाकार र दर्शकको बाक्लो उपस्थितिान शनिबार ‘सापित’ फिल्मको पहिलो प्रिमियर भव्यतापूर्वक सम्पन्न भएको हो ।
रूपक जिमीको निर्देशनमा बनेको यो फिल्म कोशी प्रदेशकै स्रोत, कलाकार र लोकेशनमा खिचिएको हो। निर्देशक जिमीले भने, “हाम्रो क्षमता र स्रोत छ, प्रयोग मात्र गर्न सक्नुपर्छ। सापितमार्फत प्रदेशमै बसेर फरक र स्तरीय फिल्म बनाउन सकिन्छ भन्ने देखाउन खोजेको हुँ।”
फिल्म हरर–थ्रिलर शैलीमा बनेको छ, जसलाई दर्शकहरूले डर र रहस्य दुवै मिसिएको अनुभव भएको बताए। प्रिमियरमा प्रमुख अतिथि नेपाल चलचित्रकर्मी महासंघ कोशी प्रदेश अध्यक्ष अरुण कुमार प्रधानले यस्तो प्रयोगात्मक फिल्म आउनु प्रदेशकै गर्वको विषय भएको बताए ।
मुख्य भूमिकामा सुकचन्द्र थापा, सन्जना त्री खत्री र जियोन तामाङ छन्। साथै उदय सुब्बा कुरुङ्ग्बाङ, विजय सन्यक सुब्बा, हेम दिलुङ्छा राई, मदन राई, दिनेश कोइराला, मिलन तामाङ लगायतका नयाँ पुस्ताका कलाकारले पहिलो पटक ठूलो पर्दामा अभिनय गरेका छन्।
फिल्मका निर्माता सागर लिम्बू (लोकेन), कार्यकारी निर्माता उदय कुमार सुब्बा, सहायक निर्देशक मिलन तामाङ रहेका छन्। प्रकाश सुब्बा र देवराज सिग्देलको छायांकनमा बनेको फिल्मलाई हेमन तामाङले सम्पादन र कलरिङ गरेका हुन्।
कोशी प्रदेशकै केरावारी–५ राजारानी, इटहरी र संखुवासभाको खादवारीलगायतका स्थानमा खिचिएको फिल्मको ट्रेलर सार्वजनिक भइसकेको छ र सामाजिक सञ्जालमा राम्रो चर्चा पाइरहेको छ। फिल्मलाई अन्तर्राष्ट्रिय स्तरमा समेत प्रिमियर गर्ने तयारी भइरहेको निर्देशक जिमीले बताए।
