लन्डन:
नेपाल विद्युत प्राधिकरणका पूर्व कार्यकारी निर्देशक कुलमान घिसिङ सोमबार बिहान लन्डन आइपुगेका छन्। ‘उज्यालो नेपाल’ अभियानसहित विभिन्न देशको भ्रमणमा रहेका घिसिङ यसअघि अमेरिकामा थिए।
लन्डनको हिथ्रो विमानस्थलको टर्मिनल २ मा उनी अवतरण गर्नेबित्तिकै एनआरएनए यूकेका प्रतिनिधि र नेपाली समुदायले फूलमाला र तालीका साथ भव्य स्वागत गरे। उपस्थितहरूले घिसिङको ऊर्जा क्षेत्रमा पुर्याएको योगदानको प्रशंसा गर्दै विदेशमा पनि नेपालका सम्भावना र अवसरबारे सुनाउने उनको प्रयासको सराहना गरे।
घिसिङले लन्डनमा रहँदा नेपाली प्रवासीहरूसँग ऊर्जा विकास, लगानी र ‘उज्यालो नेपाल’ अभियानका भावी योजनाबारे छलफल गर्ने कार्यक्रम रहेको जनाइएको छ।
एनआरएनए यूके अध्यक्ष प्रेम गाहा मगर, आइसीसी सदस्यद्वय विजय गुरुङ र सिरी गुरुङ, संरक्षक भरत रोका क्षेत्री, उपाध्यक्षद्वय तीर्थबहादुर मल्ल (अनिल) र धनबहादुर तामाङ, महासचिव जुरेन्द्र खजुम लिम्बु, सचिव कृष्णप्रसाद खतिवडा, प्रमुख सल्लाहकारद्वय क्याप्टेन रि. वीर थापा र रत्न राई एवं एनआरएनए आइसीसी सल्लाहकार थर्क सेनले घिसिङलाई स्वागत गरे ।
एनआरएनए यूकेले कुलमानसंग आगामी १५ अगष्ट साँझ अल्डरसटस्थित एम्पायर हलमा ‘मिट एन्ड ग्रीट’ गर्ने तयारी गरेको छ । उक्त कार्यक्रममा सहभागी भएर घिसिङसँग अन्तरक्रिया गर्दै ‘अन लिमिटेड थ्री कोर्स मिल’ को स्वादमा रमाउन संघका अध्यक्ष प्रेम गाहा मगरले अपिल गरेका छन् ।
कार्यक्रममा बेलायत नेपाल सम्बन्ध र गोर्खाहरुको योगदान, नयाँ नेपाल निर्माण गर्ने उनको योजना, नेपालीका दु:ख सु:ख आदिबारे पनि अन्तरक्रिया हुने जनाइएको छ ।
सो अवसरमा तामाङ सेलो, खुकुरी डान्स, नौमति बाजा जस्ता प्रस्तुति रहने संघको भनाइ छ । घिसिङले गोर्खा सालिकमा रिथ चढाएपछि उनलाई पाइपर धुनका साथ रेड कार्पेटमा स्वागत गरिने गाहा मगरले बताए ।
सबै क्षेत्रमा सुशासन, सामाजिक न्याय, गरिबी हटाउन, रोजगारी ल्याउन र निराशालाई आशामा बदल्न ‘उज्यालो नेपाल’ अभियान लिएर अगाडि बढेका घिसिङ राजनीतिमा आउने चर्चाले अहिले बजार तातेको छ।
