लन्डन : गैरआवासीय नेपाली संघ (एनआरएनए) यूकेको नयाँ नेतृत्व चयन भएको छ । सनिवार भएको निर्वाचनमा अध्यक्ष पदमा राजेन्द्र पुडासैनी विजयी भएका छन्। उनले १४८२ मत प्राप्त गर्दा निकटतम प्रतिस्पर्धी गोविन्द खरेल (९७९ मत) र मनिष खरेल (४९६ मत) प्राप्त गरे ।
को हुन् पुडासैनी?
नुवाकोटको बेलकोटगढी नगरपालिका–८ निवासी पुडासैनी २५ वर्षअघि अध्ययनको सिलसिलामा बेलायत आएका थिए। हाल उनी बेलायतको राष्ट्रिय स्वास्थ्य सेवा (NHS) मा कार्यरत छन् । शैक्षिक रूपमा पनि बलिया – उनले बेलायतकै प्रतिष्ठित विश्वविद्यालयबाट MBA र BSc (Honors) डिग्री हासिल गरेका छन्।
नेपालमा रहँदा उनी सरस्वती बहुमुखी क्याम्पसका स्ववियु सभापति थिए भने बेलायत आएपछि पनि समाजिक र ट्रेड युनियन गतिविधिमा सक्रिय छन्। हाल उनी “GMB National Union” अन्तर्गत लन्डन सेन्टर नर्थ शाखाको सचिव पदमा छन्।
त्यस्तै, यती नेपाली एसोसिएसन यूकेको महासचिव, प्रवासी नेपाली मञ्च बेलायतको अध्यक्ष, विभिन्न संस्थामा सल्लाहकार, र एनआरएनए अन्तर्राष्ट्रिय समन्वय परिषद्को पूर्व सदस्य (२०२१–२३) जस्ता भूमिकामा समेत कार्य गरिसकेका छन्।
नयाँ नेतृत्वबाट आशा के?
एनआरएनए यूकेको आगामी कार्यकालमा पुडासैनीको नेतृत्वबाट संस्थाको क्रियाशीलता, पारदर्शिता र नेपाली समुदायप्रति प्रतिबद्धता अझ बलियो हुने अपेक्षा गरिएको छ।
