इटहरी । केही दिनदेखि बादल लागेका कारण मौसम धुम्मिएको छ । तत्काल बादल हट्ने सम्भावना नरहेको जल तथा मौसम पूर्वानुमान महाशाखाले जनाएको छ ।
घाम लागेपछि दिउँसोपख आकाश खुले पनि बिहान/बेलुका भने धुम्म हुने क्रम रहेको मौसमविद् गोविन्द झाले बताए। नेपालमा पश्चिमी वायु भित्रिने क्रममा रहेको उनले बताए । अहिले मनसुन सकिन लागेको र पश्चिमी वायु बिस्तारै भित्रिने क्रममा रहेकाले पनि आकाश खुल्न नसकेको उनको भनाइ छ । यो क्रम अझै केही दिन सम्म चल्लने छ । कतैकतै बदली र वर्षाको सम्भावना रहेको छ ।
शनिबार बिहान पूर्वका केही स्थानमा पानी परेको छ । नेपालको पूर्वी तथा मध्य भागमा मनसुनी वायुको आंशिक प्रभाव रहेको छ । मौसम पूर्वानुमान महाशाखाका अनुसार शनिबार देशको पहाडी क्षेत्रमा आंशिकदेखि सामान्य बदली रही बाँकी भागमा मौसम सामान्यतया सफा रहनेछ ।
कोशी, बाग्मती, गण्डकी र कर्णाली प्रदेशका थोरै ठाउँहरु तथा बाँकी प्रदेशका एक/दुई ठाउँमा हल्कादेखि मध्यम वर्षाको सम्भावना रहेको छ ।
बिहिबार पनि देशको पहाडी क्षेत्रमा मौसम आंशिकदेखि सामान्य बदली रहने र बाँकी अरु क्षेत्रमा मौसम सामान्यतया सफा नै रहनेछ । असोज अन्तिम हप्तामा पनि मनसुन नेपालबाट पूर्णरुपमा बाहिरिसकेको छैन । सामान्यतया अक्टोबर २ तारिखमा मनसुन बाहिरनुपर्नेमा शनिबार अक्टोबर १४ तारिख भइसकेको छ ।
नेपालको पश्चिमी क्षेत्रबाट भने मनसुन बाहिरिसकेको छ । मध्य र पूर्व हुँदै मनसुन बाहिरिने क्रममा छ । यसपालि गत जेठ ३१ गते मनसुन नेपाल भित्रिएको थियो ।
