इटहरी । जनता समाजवादी पार्टी (जसपा) की सांसद निर्मला लिम्बू कोसी प्रदेशको स्वास्थ्य मन्त्री नियुक्त भएकी छन् । मुख्यमन्त्री उद्वव थापाले उनलाई शुक्रबार मन्त्री नियुक्त गरेका हुन् ।
मन्त्री नियुक्त भएसँगै उनलाई प्रदेश प्रमुख परशुराम खापुङले पद तथा गोपनीयताको शपथ गराए । ९३ सदस्यीय प्रदेशसभामा लिम्बू जसपाकी एकमात्र सांसद हुन् । यसअघि उनी हिक्मतकुमार कार्की नेतृत्वको सरकारमा पनि स्वास्थ्य मन्त्री नै थिइन् ।
लिम्बू मन्त्री बनेपछि कोसी प्रदेश सरकार पाँच सदस्यीय भएको छ । यसअघि पूर्वसभामुख एवं माओवादी सांसद बाबुराम गौतमले आर्थिक मामिला तथा योजना, कांग्रेसका प्रदीप सुनुवारले खानेपानी, सिँचाई तथा उर्जा र एकीकृत समाजवादीका कमलप्रसाद जबेगूले भौतिक पूर्वाधार विकास मन्त्रालयको जिम्मेवारी पाएका छन् ।
