इटहरी । मोरङको बेलबारी नगरपालिका ९ बाहुनीस्थित जनता माध्यमिक विद्यालयको बसका चालक मृत फेला परेका छन् ।
बेलबारी ९ घर भएका ४९ वर्षीय कालुराम चौधरी सोमबार बिहान मृत फेला परेका हुन् । मोरङ प्रहरीका अनुसार बेलबारी ७ कदम चोकस्थित नालीमा घोप्टो परेको अवस्थामा चौधरीको शव फेला परेको हो ।
चौधरीको शवनजिकै उनले चलाएको को १० प ९१९७ नम्बरको मोटरसाइकल पनि लडिरहेको अवस्थामा भेटिएको प्रहररीले जनाएको छ ।
प्रहरीका अनुसार हावाहुरी चलेको रातको समयमा मोटरसाइकल दुर्घटनामा परेर चौधरीको मृत्यु भएको हुनसक्ने अनुमान गरिएको छ ।
चौधरीको शवलाई पोस्टमार्टमका लागि उर्लाबारीको मंगलबारेस्थित मदन भण्डारी अस्पताल एण्ड ट्रमा सेन्टर लगिएको छ।
इलाका प्रहरी कार्यालय बेलबारीका प्रहरी निरीक्षक उदय शम्शेर राणा नेतृत्वको टोलीले घटनाको अनुसन्धान गरिरहेको प्रहरीले जनाएको छ ।
