इटहरी । खोटाङमा गाडीबाट खसेर शुक्रबार राति एक जनाको मृत्यु भएको छ ।
खोटेहाङ गाउँपालिका ४ कुलाभन्ज्याङस्थित भित्री कच्ची सडक खण्डमा दिक्तेलबाट खोटाङ बजार जाँदै गरेको बा ३ ख ३४४१ नम्बरको बसबाट खसेर जन्तेढुङ्गा ३ का ३८ वर्षीय दिनेश राईको मृत्यु भएको हो ।
बसबाट ओर्लने क्रममा बसको ढोकाबाट लडेर गम्भीर घाइते भएका उनको स्वास्थ्य चौकी खोटाङ बजारमा मृत्यु भएको प्रहरीले जनाएको छ ।
बस चालक खोटाङको हलेसी तुवाचुङ नगरपालिका १ बस्ने २३ वर्षीय मनोज कार्की तत्काल फरार रहेकाले उनको खोजी कार्य भइरहेको प्रहरीले जनाएको छ ।
घटनाबारे थप अनुसन्धान भइरहेको छ ।
