इटहरी । सुनसरीको इटहरीस्थित एस.ओ.एस हर्मन माइनर विद्यालयले प्राविधिक धारको कम्प्युटर इन्जिनियरिङ सम्बन्धी कक्षा सुरु गर्ने भएको छ ।सुनसरीमै पहिलोपटक सुरु भएको कम्प्युटर इन्जिनियरिङ सम्बन्धी प्राविधिक शिक्षामा अभिभावकहरू आकर्षित भएका छन् ।
युवा वर्गमा प्रविधि र सञ्चारप्रतिको आकर्षण बढिरहेको र स्थानीय स्तरमा यस सम्बन्धी जनशक्तिको पनि अभाव रहेकाले यस इन्जिनियरिङ सम्बन्धी कक्षा सञ्चालनले दक्ष जनशक्ति निर्माणमा सहयोग पुग्ने दाबी गरिएको छ ।
इटहरी उपमहानगरपालिकाको समन्वय र सहकार्यमा यसै शैक्षिक सत्रदेखि इन्जिनियरिङ धारको पठनपाठन सुनसरी जिल्लामै पहिलोपटक सुरु गरिएको विद्यालयका प्रधानाध्यापक शान्तिराम तिम्सिनाले जानकारी दिए ।
कुल ४८ जनाको सिट रहेको उक्त कक्षामा पच्चीस प्रतिशत लक्षित वर्गका विद्यार्थीले छात्रवृत्ति समेत पाउने छन् ।
प्रधानाध्यापक तिम्सिनाका अनुसार एसओएस बालग्राम नेपालद्वारा सञ्चालित एसओएस हर्मन माइनर माध्यमिक विद्यालय इटहरी कै एक परियोजना हो ।
एसओएस बालग्राम नेपाल, पारिवारिक संरक्षणविहीन तथा परिवारको संरक्षणबाट वञ्चित हुने अवस्थामा रहेका बालबालिकाहरूका लागि विगत ५१ वर्षदेखि कार्यरत बालहितकारी सामाजिक संस्था हो । एसओएस बालग्राम नेपालले राष्ट्रभर १० बालग्रामसहित ४४ वटा परियोजना सञ्चालन गर्दै आएको उनले बताए ।
पछिल्लो समयमा विद्यार्थीहरूको आकर्षणका रूपमा रहेको कम्प्युटर इन्जिनियरिङ सम्बन्धी पठनपाठनका लागि विद्यार्थीहरू इटहरीबाट बाहिरिने क्रममा बढिरहेका बेला विद्यालय तहमै कक्षा ९ देखि १२ सम्मको कार्यक्रम इटहरीमा नै सुरु भएको हो ।
एसओएस हर्मन माइनर माध्यमिक विद्यालय इटहरीले हालसम्म २४ वटा एसईई ब्याच उत्पादन गरिसकेको छ ।
‘प्राविधिक शिक्षा आजको आवश्यकता’ भन्ने सन्देशलाई आत्मसात् गर्दै विद्यालयले इटहरी उपमहानगरपालिकासँग सहकार्य गरी प्राविधिक धारमा विद्यार्थी भर्नाका लागि आवेदन खुला गरेको प्रधानाध्यापक तिम्सिना बताउँछन् ।
