इटहरी । सुनसरीको इनरुवामा अपांग बालिका उपर करणीको आरोपमा पक्राउ परेका व्यक्ति छुटाउन पीडित पक्षलाई दवाव दिदै आएको विषय बाहिरिएको छ ।
इनरुवा ४ को उक्त घटनामा पीडक पक्षका आफन्तले पैसाको प्रलोभन दिएर मुद्दा फिर्ता लिन दवाव दिने गरेको पीडित पक्षको भनाइ छ । करणीको आरोपमा प्रहरीले संलग्न व्यक्तिलाई पक्राउ गरी कारबाही चलाइसकेको छ ।
प्रहरी प्रतिवेदनका आधारमा अदालतले प्रतिवादीलाई पुर्पक्षका लागि कारागार चलान समेत गरीसकेको छ ।
यद्यपि, पीडित परिवारले भने आफूहरुले धाकधम्की खेपिरहनु परेको भन्दै गुनासो गरेका छन् ।
उनीहरुले पीडक पक्षले आफूहरुलाई मुद्दा फिर्ता लिन धाकधम्की दिदै आएको बताए । पीडितको घरमा केही दिनअघि आगलागी भएको थियो । जसलाई सुनियोजित दावी गर्दै आएको पीडित परिवारले त्यसपछि भने असुरक्षित महशुस गरेको छ ।
मुद्दा फिर्ता लिन दिइँदै आएको धम्की र आर्थिक प्रलोभनको विषय पीडित परिवारले बाहिर ल्याएको हो । पीडितकी आमाले आफूलाई आएको धम्कीको बारेमा छिमेकीहरुले समेत साथ नदिएको कुरा व्यक्त गरेकी छन् ।
घटनाको विषयमा सुनसरी प्रहरीले भने करणीको आरोपमा पक्राउ गरिएका व्यक्तिलाई जिल्ला अदालत बुझाइएको र त्यहाँबाट कारागार चलान भएको बताएको छ ।
घरमा लागेको आगलागीको पछिल्लो घटनाको बारेमा भने थप अनुसन्धान जारी रहेको प्रहरी जनकारी दिएको छ ।
