इटहरी । इटहरीमा एक युवकमाथि छुरा प्रहार भएको छ । शुक्रबार दिउँसो इटहरी १ स्थित पीपल चौकनजिकै मुख्य राजमार्गमा युवकमाथि छुरा प्रहार भएको हो ।
इटहरी १४ गैसारका अन्दाजी ३० वर्षीय मोहमद अफ्तारमाथि छुरा प्रहार भएको हो । उनीमाथि तीनजनाको समूहले छुरा र चिर्पट प्रहार गरेको बताइएको छ ।
‘राजमार्गमा उभिइरहेको बेला पछाडिबाट चिर्पट प्रहार गरियो,’ एक प्रत्यक्षदर्शीले भने, ‘चिर्पट प्रहार गरेपछि छुरा प्रहार गरियो, छुरा प्रहारमा संलग्नलाई हामीले घेरेर पक्राउ गरी प्रहरीकहाँ बुझाएका छौँ ।’
छुरा प्रहारबाट घाइते भएका अफ्तारको इटहरीस्थित सामुदायिक अस्पतालमा उपचार भइरहेको इलाका प्रहरी कार्यालय इटहरीका प्रहरी निरीक्षक भीमबहादुर खड्काले जानकारी दिए ।
पैसाको लेनदेनका कारण छुरा प्रहार भएको हुनसक्ने प्रारम्भिक अनुसन्धानबाट खुलेपनि घाइते युवकले आँफूमाथि छुरा प्रहार गर्ने व्यक्तिलाई नचिनेको बताएका छन् ।
छुरा प्रहारमा संलग्न दुईजनालाई प्रहरीले पक्राउ गरेको छ । घटनाबारे थप अनुसन्धान भइरहेको इलाका प्रहरी कार्यालय इटहरीले जनाएको छ ।
