इटहरी । आसन्न चैत ५ गते हुने स्वतन्त्र विद्यार्थी युनियन (स्ववियु) को निर्वाचनमा सुनसरीका सात क्याम्पसमा विभिन्न विद्यार्थी संगठनले तालमेल गर्दै चुनावी मैदानमा होमिएका छन् ।
जिल्लाका सात क्याम्पसमध्ये जनता बहुमुखी क्याम्पस इटहरीमा नेविसंघ र समाजवादी विद्यार्थी संगठनबीच तालमेल भएको छ । यहाँ नेविसंघबाट सहदेव काफ्ले सभापतिको उम्मेदवार बनेका छन् । यस्तै, सचिवमा भने समाजवादी विद्यार्थी संगठनका अर्जुन राई उम्मेदवार बनेका छन् । यस्तै, जनता क्याम्पसमा अनेरास्ववियु र अखिल क्रान्तिकारीबीच चुनावी तालमेल भएको छ ।
अनेरास्ववियुका उज्ज्वल सिग्देल सभापतिको उम्मेदवार बन्दा अखिल क्रान्तिकारीका अर्जुन पौडेल सचिवका उम्मेदवार बनेका छन् । यस्तै, सप्तकोसी बहुमुखी क्याम्पस चक्रघट्टीमा सभापति नेविसंघका मार्शल तामाङले उम्मेदवारी दर्ता गरेका छन् । उनलाई राप्रविसंघ, अनेरास्ववियु क्रान्तिकारीको साथ छ ।
यस्तै, सो क्याम्पसमा चित्रामान राईले एकल उम्मेदवारी दिएका छन् । यस्तै, धरानस्थित पूर्वाञ्जल इन्जिनियरिङ क्याम्पसमा नेविसंघका नवीन श्रेष्ठ सभापतिको उम्मेदवार बनेका छन् । यहाँ समाजवादी विद्यार्थी संगठनलाई सचिव दिनेगरी तालमेल भएको बताइएको छ । यस्तै, सो क्याम्पसमा मन्दीप अधिकारी र अशेष रेग्मीले एकल उम्मेदवारी दिएका छन् ।
धरानकै महेन्द्र बहुमुखी क्याम्पसमा नेविसंघबाट विनोद आले मगरले सभापतिमा उम्मेदवारी दर्ता गराएका छन् भने उनलाई अनेरास्ववियु क्रान्तिकारीको साथ छ । सो क्याम्पसमा सुनील सुब्बाले एकल उम्मेदवारी दर्ता गराएका छन् ।
यस्तै, हात्तीसार केन्द्रीय प्रविधि क्याम्पसमा प्रतीक ओझा र अवनिव गुरागाईँले एकल उम्मेदवारी दिएका छन् । सुनसरी बहुमुखी क्याम्पस इनरुवामा नेविसंघका देवकुमार यादवले सभापतिमा उम्मेदवारी दिएका छन् । यस्तै, सुनसरी बहुमुखी क्याम्पस इनरुवामा नन्दन गुप्ताले एकल उम्मेदवारी दिएका छन् ।
धरानको पिण्डेश्वर क्याम्पसमा भने विवादका कारण निर्वाचन अनिश्चित छ । टाकुरा न्यूजको सहयोगमा
